«Հայրենիքի փրկության ճակատը» հնարավոր է դադարեցնի իր գործունեությունը։ Մամուլի տարբեր հրապարակումների համաձայն՝ ճակատի անդամ քաղաքական ուժերը միակարծիք չեն արտահերթ ընտրությունների անցկացման հարցում։ Ոմանք, այդ թվում՝ ճակատի վարչապետի միասնական թեկնածու Վազգեն Մանուկյանը, կտրականապես մերժում են այս իշխանությունների կազմակերպած ընտրություններին մասնակցությունը, ոմանք էլ կարծում են, որ պետք է փորձել՝ հատկապես, երբ այդ ընտրություններին մասնակցելու պատրաստակամություն հայտնեց երկրորդ նախագահ Ռոբերտ Քոչարյանը։
Ի դեպ՝ միանշանակ չէ նաև «Բարգավաճ Հայաստանի» հետագա մասնակցությունը։ Որոշ տեղեկությունների համաձայն՝ ճակատում ֆինանսական ու մարդկային ամենամեծ ռեսուրսներ ունեցող այս ուժը ևս հնարավոր է տարանջատվի ճակատից ու արտահերթ ընտրություններին մասնակցի առանձին ցուցակով՝ Գագիկ Ծառուկյանի գլխավորությամբ։
ԳԽ պատգամավոր Ազատ Արշակյանի կարծիքով՝ «Հայրենիքի փրկության ճակատը» ձևավորվել էր հապշտապ՝ հապշտապ իշխանություն վերցնելու նպատակով: «Բլից-կրիգ տարբերակը պետք է լիներ, և դրա համար միավորվելիս ուշադրություն չէին դարձնում, թե ով է իրենց կողքին, ովքեր են իրենց ընկերները։ Օրինակ՝ ԵԺԿ դաշնակից Հանրապետական կուսակցությունը, «Եդինայա Ռոսիային» հարող «Բարգավաճ Հայաստան» կուսակցությունը։ Դրանք հակամարտող, մրցակից, իրարից խլող, իրար փոխարինող այլընտրանքային կազմակերպություններ են։ Նրանց ծրագրերը, գաղափարախոսությունը, անհատների նկարագիրը անհամատեղելի են։ Նրանք չեն կարող հարթակում կանգնել իրար կողք։ Եվ բնական է, որ այսպես պետք է լիներ։ Այդ «հապճեպը» չստացվեց, և բնական է, որ ամեն մեկը պետք է վերադառնար իր երամին»,- «Առաջին լրատվական»-ի հետ զրույցում ասաց նա։
Արշակյանի դիտարկմամբ՝ բնական է, որ նրանք այժմ պետք է նոր ծրագրեր կազմեն ու վերադառնան իրենց էլեկտորատին, իրենց գաղափարախոսությանը. «Եթե որևէ մեկը ձայն է տալիս Հայ Յեղափոխական Դաշնակցությանը, նա ակնհայտորեն մերժում է մրցակից կուսակցություններին։ Հիմա ամեն մեկը վերադառնում է իր ակունքներին։ Այդ «անառակ որդիները» վերադառնում են հայրական գաղափարախոսության օջախ»։
Գերագույն խորհրդի պատգամավոր Վիգեն Խաչատրյանի խոսքով՝ ի սկզբանե պարզ էր, որ «Հայրենիքի փրկության ճակատն» արհեստածին է և պետք է տապալվեր: «Որևէ զարմանալի բան այստեղ չկա։ Հիմա եթե առանձին-առանձին մասնակցեն ընտրություններին՝ ժողովուրդն իր վերաբերմունքը ցույց կտա։ Արտառոց բան չեմ տեսնում»,- «Առաջին լրատվական»-ի հետ զրույցում ասաց նա։
Ըստ Խաչատրյանի՝ այն մթնոլորտը, որ ձևավորվել է Հայաստանում, որը ենթադրում է մարդկանց ազատ կամարտահայտման դրսևորում, պետք է իրականություն դառնա. «Այսինքն՝ պետք է թույլ տան, մենք էլ համոզվենք, թե հասարակության որ շերտերը ինչ նախապատվություն ունեն։ Կարևոր է, որ այս գործող իշխանությունները իրենց հռչակած սկզբունքներին հավատարիմ մնան ու կանխեն ցանկացած ոտնձգություն։ Այսինքն՝ բացառեն ընտրակաշառքը, թաղի խուժանի ակտիվացումը, կրիմինալի մասնակցությունը։ Այս բոլորը եթե ապահովիի, հասարակությունն իր սթափ վերաբերմունքը ցույց կտա, և ռևանշի որևէ փորձ դատապարտված կլինի ձախողման»։
Լուսանկարը՝ Photolure-ի
