Ծրագրված է Մինսկի խմբի համանախագահների այցը Արցախ, ժամկետ հստակ չէ: Փաստը ողջունելի է, բայց արդյո՞ք սա նշանակում է Մինսկի խմբի համանախագահության վերակենդանացում կամ ապասառեցում: «Առաջին լրատվական»-ի հետ զրույցում անդրադառնալով այս հարցին՝ բանակցային գործի մասնագետ Արթուր Մարտիրոսյանը նշեց. «Այն, որ Մինսկի խմբի երեք նախագահողները՝ ԱՄՆ-ը, Ֆրանսիան և ՌԴ-ն պետք է միանային և անցնեին համատեղ գործողությունների, պարզ էր, մինչ ԱՄՆ ընտրությունները դա չէր լինի, իսկ այժմ այդ հարցերը կարգավորվելու են, և մոտակա ժամանակներում կիմանանք՝ Մինկի խումբը շարունակելու է առաջնորդի դերը փորձել ամրապնդել, թե ոչ: Կարծում եմ, որ կփորձեն վերականգնել դիրքերը»:
Անդրադառնալով հարցին, թե Հայաստանի առաջնային անելիքը ո՞րը պետք է լինի արտաքին քաղաքականության առումով, Մարտիրոսյանը նշեց, որ ընդհանրապես քաղաքականություն վարելու համար Հայաստանին պետք է իշխանություն, որը կկարողանա համախմբել, մոբիլիզացնել ամբողջ ազգը: «Փաշինյանը, իշխող ուժը այլևս բարոյական կապիտալ չունեն համախմբելու հայությանը: Սփյուռքում էլ արդեն մեծամասամբ բացասական է վերաբերմունքը: Դրսում բանակցելու հզորությունը նաև Սփյուռքն է, և երբ որ Սփյուռքը պառակտված է, չես կարող ստանալ այն արդյունքները, որը անհրաժեշտ է: Տակտիկական խնդիրներն ակնհայտ են՝ գերիների խնդիր, սահմանների խնդիր, հստակ պետք է սահմանել, թե որոնք են ռազմավարական նպատակները, դրա համար պետք է ունենալ նաև բարոյական լեգիտիմություն:
Ժողովրդավարություն Հայաստանում այժմ չկա… Փաշինյանը նախկիններից ոչնչով չի տարբերվում»,- նշեց Մարտիրոսյանը:
