«Թե ինչպիսին կլինի 2021-ը, կախված է հենց քեզանից». Dargett ընկերությունը հետաքրքիր նախաձեռնությամբ է հանդես եկել՝ տարածելով այս ֆլեշմոբը:
«Նման ֆլեշմոբերի նպատակը տրամադրությունների փոփոխությունն է: Մենք բնական ընթացքում ենք, պարտություն ենք կրել, հսկայական կորուստներ ունենք, և սպասել, որ թեթև դուրս կգանք դրանից, իրատեսական չէ: Բայց ֆլեշմոբի ուղերձն այն է, որ պասիվ սպասելիքներն անիմաստ են, պետք է գործողությունների գնալ, և այն, ինչ ուզում ես ստանալ, դա քո գործողություններից է կախված»,- «Առաջին լրատվական»-ի հետ զրույցում ասաց ԱԺ առաջին գումարման պատգամավոր, Republica հյուրանոցի և Dargett գարեջրի Հովհաննես Դուրգարյանը՝ ընդգծելով, որ ուղերձի հիմնական իմաստն այն է, թե յուրաքանչյուրն ինչ է անելու այս տարի և ոչ թե սպասի, թե ինչպիսին է լինելու տարին:
Իսկ իբրև հասարակություն, արդյո՞ք մենք գիտենք՝ ինչ ենք անելու այս տարի, հաջորդ տարի, առաջիկա տարիներին, ձևակերպե՞լ ենք այն գաղափարները, որոնց շուրջ ուզում ենք համախմբվել: Այս հարցին ի պատասխան՝ Դուրգարյանը նշեց, որ իր կարծիքով այդ գաղափարները Սահմանադրության մեջ են ձևակերպված, և դրանք անընդհատ չեն փոխվում: «Մենք ուզում ենք լինել սուվերեն, արդար, ուզում ենք լինել գնահատված, ապրել բարեկեցիկ, ուզում ենք, որ լինի արդարադատություն: Սրանք են այն հիմնարար ձգտումները, որ ցանկացած հասարակություն ունի:
Անցած տարվա դժբախտոթյունները կարծես մի նոր թափ հաղորդեցին ազգային, պետական ձգտումներին, որովհետև այն, ինչը ամենակարևորն է ցանկացած ժողովրդի համար, այսինքն՝ անվտանգությունը, մենք բաց էինք թողել:
Տեսականորեն կար գիտակցում, որ կարող է պատերազմ լինել, բայց դա հասարակությունը չէր ընկալում որպես կարևոր ռիսկ, որից պետք է ակտիվ պաշտպանվել և նվազագույնի հասցենլ այդ ռիսկը: Պատերազմը բացառելու, խաղաղ գոյակցությունը պահպանելու ձգտումը, կարծում եմ, առաջիկա տարիներին ավելի մեծ կլինի, քան նախորդ տարիներին»:
Մեր զրուցակցի դիտարկմամբ՝ մանիպուլյացիաների քանակը շատ-շատ է քաղաքականության մեջ, հասարակությանը փորձում են կերակրել սին խոստումներով՝ հասնելով կարճաժամկետ «քաղաքական սիմպատիաների»: «Բայց Կեղծ գաղափարների շուրջ մարդկանց համախմբման միտումը գնալով նվազում է,- նշեց դուրգարյանը: -Մարդիկ սթափել են: Հիմա դատարկ խոստումներով մարդկանց մոբիլիզացնելու հնարավորությունն այլևս չկա»:
Մանրամասն՝ տեսանյութում: