Սադիր Ժապարովը քվեաթերթիկների ավելի քան 74 տոկոսի ձեռքով հաշվելու արդյունքներով 83,9 տոկոս ձայներով առաջատարն է Ղրղզստանի նախագահի վաղաժամկետ ընտրություններում, որոնք անցկացվել են հունվարի 10-ին:
Այդ մասին են վկայում հանրապետության ԿԸՀ-ի կայքում զետեղված տվյալները: Երկրորդ տեղը 5,56 տոկոս ձայներով զբաղեցնում է ընդդիմադիր թեկնածու Ադահան Մադումարովը:
Կենտրոնական ընտրական հանձնաժողովում արձանագրություններ են ստացվել 1816 ընտրատեղամասերից:
Ձայների 98 տոկոսի հաշվելու արդյունքներով, Ժապարովը Ղրղզստանի նախագահի վաղաժամկետ ընտրություններում հաղթանակ է տանում 79,2 տոկոս ձայներով:
Ընդամենը Ղրղզստանի նախագահի պաշտոնի համար հունվարի 10-ին անցկացված վաղաժամկետ ընտրություններում պայքարել է 17 թեկնածու:
Ընտրողների մասնակցությունը կազմել է ավելի քան 39 տոկոս: Ղրղզստանում պետության ղեկավարի վաղաժամկետ ընտրությունների հետ միասին հունվարի 10-ին հանրաքվե է անցկացվել կառավարման ձեւի շուրջ:
Ընտրողների 81 տոկոսը քվեարկել է հանրապետությունում կառավարման նախագահական ձեւի օգտին, ընտրողների 10,94 տոկոսն ընտրել է խորհրդարանական հանրապետությունը, ընտրողների 4,45 տոկոսը քվեարկել Է «բոլորի դեմ»:
Ժապարովը երկրում իշխանության է եկել անցյալ տարի՝ խորհրդարանական ընտրությունների արդյունքների դեմ հոկտեմբերյան բողոքներից եւ այնուհետեւ բռնկած անկարգություններից հետո:
Նախագահի ընտրություններին մասնակցելու համար նոյեմբերի 14-ին նա վայր է դրել պետության ղեկավարի ժամանակավոր պաշտոնակատարի լիազորությունները եւ դադարեցրել վարչապետի պարտականությունների կատարումը, հաղորդել է «Ինտերֆաքս»-ը:
