2020 թվականը ծանր տարի էր ամբողջ աշխարհի՝ հատկապես Հայաստանի համար․ համավարակ, հետո պատերազմ, հիմա էլ ներքաղաքական ճգնաժամ և բազում մարտահրավերներ։
Ի՞նչ թողեցինք 2020-ում, և ի՞նչ բեռով ենք գնում 2021 թվական․ «Առաջին լրատվական»-ի հարցին կրթության փորձագետ Արեգ Թադևոսյանը պատասխանեց․ «Նախ պետք է ասեմ, որ այս տարի մինչև զանգերը կխփեն, մենք դեռ անելու բան ունենք, ու դա շատ կարևոր է, որպեսզի հասկանանք։ Մեծ մարտահրավերներ են լինելում, մեծ աղետներ են գալիս, մեծ վնասներ ես կրում, բայց ի՞նչ ես անում դրանից հետո։ Թե՛ հաղթանակի ժամանակ, թե՛ պարտության ժամանակ էներգիան ու ռեսուրսը բավականին մեծ է։ Պարտությունը ևս ցույց է տալիս, թե որտեղ են քո լուրջ թերացումները։ Ամեն մեկիս դիրքորոշումից է կախված, թե այդ հսկայական էներգիան, որ կա, ուր կուղղորդենք։ Այսինքն՝ մենք դա կուղղորդենք զարգացման, ինքնակատարելագործման ուղղությամբ, թե կընկնենք դեպրեսիվ վիճակների մեջ՝ կնստենք ծառի տակ ու նարդի խաղալով կասենք՝ վայ, ինչ վատ ա։ Դա էլ է էներգիան վատնելու ձև, որը քիչ-քիչ կծախսվի, սակայն աշխարհին ոչ մի նոր բան չի բերի»։
Ի՞նչ սպասելիքներ ունեք 2021 թվականից․ «Առաջին լրատվական»-ի հարցին Արեգ Թադևոսյանը պատասխանեց․ «Այսօր առավոտյան, երբ դեռ պառկած էի, լսեցի, թե ինչ են ասում քրոջս երեխաները։ Նրանք ինձ լավ դաս տվեցին։ Երեխաներն ասում էին, որ հասկանում ենք՝ 2020 թվականը վատ տարի է, դրա համար տոնածառ չենք դնում, բայց ժամը 12-ից հետո, երբ տարին փոխվի, ինչո՞ւ չի կարելի տոնածառ դնել։ Երեխաներն ինչ-որ տեղ մեզնից ավելի իմաստուն են՝ ավելի լավ են ֆիքսում այդ շրջադարձային կետերը»։
Մանրամասները՝ տեսանյութում։
