Նիկոլ Փաշինյանը վերջին օրերին հրապարակումների շարք է սկսել, որտեղ փակագծեր է բացում և ներկայացնում, թե ինչ եղավ, ինչպես եղավ, նաև խոսեց այն մասին, թե ինչու Մոսկվա չեն մեկնել ՀՀ առաջին և երկրորդ նախագահները: Թեմայի շուրջ «Առաջին լրատվական»-ի հետ զրույցում «Հանուն հանրապետության» ԺՊԴԿ ղեկավար մարմնի անդամ Վահագն Մարտիրոսյանը նշեց, որ Նիկոլ Փաշինյանը փորձում է մեղքը իր վրայից այլ անձանց վրա կենտրոնացնել, չնայած այն հանգամանքին, որ այն անձինք, որոնց նա անդրադարձել է վերջին գրառումներում, պակաս դերակատարություն չեն ունեցել այս ամենի մեջ իրենց կառավարման շրջանում:
«Տարօրինակ է, որ Նիկոլ Փաշինյանը հիմա է այդ մասին խոսում, ստեղծված իրավիճակի մասին նա պետք է խոսեր պատերազմից առաջ:
Փաշինյանը քաղաքացիներին խոստացել էր, որ եթե Արցախյան խնդրի լուծման տարբերակ լինի, կհավաքի ժողովրդին Հանրապետության հրապարակում, և ժողովուրդն ինչպես կորոշի, այդ քայլերն էլ կձեռնարկվեն, բայց Նիկոլ Փաշինյանը չի կատարել իր այս գլխավոր խոստումը:
Փաշինյանն այս գրառումներով փորձում է դավաճանի պիտակից ձերբազատվել և տպավորություն ստեղծել, որ այն ինչ արել է, ժողովրդի մեջքի հետևում չի արել»,- նշեց Մարտիրոսյանը:
Վարչապետ Նիկոլ Փաշինյանի գրառումներին անդրադարձել են ՀՀ և՛ առաջին, և՛ երկրորդ նախագահների գրասենյակները: «Տեր-Պետրոսյանն անիմաստ է համարում արձագանքել ազգակործան պատուհասի հոգեկան տվայտանքներին: Ինչ ուզում է թող դուրս տա, միևնույն է, նա արդարանալու ճար չունի հայ ժողովուրդը նրան երբեք չի ներելու»,- նշել է Լ. Տեր-Պետրոսյանի մամուլի խոսնակը: Երկրորդ նախագահի գրասենյակից էլ նշել են, որ «սուտն ու նենգափոխումը անբաժան են Նիկոլից:
Անդրադառնալով այս դիտարկումներին, մեր զրուցակիցը նկատեց, որ սա ոչ միայն վիրտուալ պատերազմ է, այլ նաև այս արձագանքներով նախկին նախագահները փորձել են պատասխանատվությունն իրենց վրայից կենտրոնացնել Փաշինյանի վրա, բայց այս ամեն ինչի պատճառը առնվազն վերջին քառորդ դարում տեղի ունեցած իրադարձություններն են:
«Փաշինյանին չի ներվելու ժողովրդի հետ ազնիվ չլինելը, ժողովրդին փաստի առաջ կանգնեցնելը, նա մեղադրում էր Սերժ Սարգսյանին՝ ժողովրդին խաբելու համար, նույնի համար ինքն է պատասխան տալու»,- ընդգծեց Մատիրոսյանը:
Մանրամասն՝ տեսանյութում:
