Ելիսեյան պալատում տեղի է ունեցել ՀՀ նախագահ Արմեն Սարգսյանի և Ֆրանսիայի նախագահ Էմանուել Մակրոնի հանդիպումը: Հայաստանի և Ֆրանսիայի նախագահները մտահոգություն են հայտնել արցախյան հակամարտության շուրջ ստեղծված իրավիճակի կապակցությամբ:
ՀՀ նախագահի օգնական Գևորգ Մելիքյանը «Առաջին լրատվական»- ի հետ զրույցում նշեց, որ այդ հանդիպումը կարևոր էր. «Գիտեք, որ հոկտեմբերի 17-ին Ֆրանսիան, որպես համանախագահող երկիր, հադես եկավ հրադադարի հաստատման նախաձեռնությամբ, ցավոք այն չիրագործվեց, ադրբեջանական կողմը այն խախտեց և ոչ միայն շարունակեց, այլև հստակ հայտարարեց, որ այդպես էլ անելու է, և ի չիք դարձան համանախագահներից առնվազն երկուսի՝ ՌԴ-ի և Ֆրանսիայի բոլոր ջանքերը:
Հայաստանի և Ֆրանսիայի նախագահների այս հանդիպումը հենց այն համատեքստում էր, թե ինչպես անել, որ հնարավոր լինի հասնել հրադադարի: Նախագահ Սարգսյանի հիմնական շեշտադրումը վերաբերում էր Թուրքիայի ներգրավվածության հարցին, և այն հարցին, թե ինչպես հասնել նրան, որ Թուրքիայի նկատմամբ ճնշումներն ավելանան: Աշխատանք է տարվում, որ Թուրքիայի նկատմամբ լինեն պատժամիջոցներ կամ գոնե էմբարգոներ «բայրակթարների» մեջ օգտագործվող բաղադրիչ-պահեստամասերի վրա: Հայկական կողմը աշխատանքներ է տանում այն երկրների հետ, որոնք մատակարարում են այդ բաղադրամասերը: Թուրքիայի աջակցությամբ Ադրբեջանի սանձազերծած ագրեսիայի վերաբերյալ քննարկման ժամանակ անդրադարձ կատարվեց նաև քաղաքացիական բնակչության և ենթակառուցվածքների թիրախավորմանը և այլն: Իհարկե անդրադարձ է կատարվել նաև հայ-ֆրանսիական հարաբերություններին: Եվ նախագահ Մակրոնը խոսել է նաև այն մասին, որ ԼՂ-ում վիրավորվածներին իր երկիրը կուղարկի բժշկական օգնություն»:
Մանրամասն՝ տեսանյութում:
