ԱԴԾ-ն վնասազերծել է Ռուսաստանում արգելված «Katiba Tawhid wal-Jihad» միջազգային ահաբեկչական կազմակերպության բջիջի երկու անդամների, որոնք պատրաստվում էին ահաբեկչություններ իրականացնել Վոլգոգրադում: Այս մասին ՏԱՍՍ-ին հայտնել են ՌԴ ԱԴԾ հասարակայնության հետ կապերի կենտրոնից:
Ինչպես նշվում է, ահաբեկիչների գործողությունները համակարգվել են Սիրիայի տարածքից: Զինյալները ծրագրում էին հարձակումներ «կառավարական շենքերի, զինծառայողների բնակության վայրերի և պայթյունահրդեհավտանգ ձեռնարկությունների վրա»: «Ձերբակալության ընթացքում պարագլուխը և նրա հանցակիցը, որոնք փորձում էին ահաբեկչության միջոցները դուրս բերել Վոլգոգրադում նախապես սարքավորված թաքստոցից, զինված դիմադրություն են ցույց տվել ՌԴ ԱԴԾ-ի աշխատակիցներին և արդյունքում վնասազերծվել են»,- նշել են ՌԴ ԱԴԾ հասարակայնության հետ կապերի կենտրոնից:
Ինչպես հաղորդել են ԱԴԾ-ից, ահաբեկչական խմբավորման անդամները ծագումով Կենտրոնական Ասիայի տարածաշրջանի երկրներից են: Դեպքի վայրում, ինչպես նաև այն բնակարաններում, որտեղ ապրել են արմատական իսլամիստները, քննիչները հայտնաբերել են հրազեն, զինամթերք, քիմիական բաղադրիչներ և զինամթերք`պայթուցիկ սարքերի համար, ինչպես նաև կրոնական գրականություն: Բացի այդ, հաջողվել է գտնել Վոլգոգրադի քարտեզը, որի վրա նշված են եղել ահաբեկչությունների նախանշված վայրերը: Մասնավորապես, գրոհայինները ահաբեկչություն էին ծրագրել «Մայր հայրենիքի» հուշարձանի մոտ, որը քարտեզի վրա սև գույնով է շրջանառված:
Սա երևում է ԱԴԾ-ի հրապարակած տեսանյութում:
«Միևնույն ժամանակ, Մոսկվայում, Սանկտ Պետերբուրգում, Ուֆայում, Մայկոպում և Վոլգոգրադում ձերբակալվել են միջմարզային բջջի այլ անդամներ, որոնց վերաբերյալ կայացվում են ընթացակարգային որոշումներ»,- ընդգծել են հասարակայնության հետ կապերի կենտրոնում:
