Lufthansa Technik- ի աշխատակիցները հրաժարվել են սպասարկել Բելառուսի նախագահ Ալեքսանդր Լուկաշենկոյի ինքնաթիռը: Այս մասին հոկտեմբերի 14-ին հաղորդել է «Նաշա նիվա» պարբերականը:
Ինչպես նշում է պարբերականը, EW-001PA համարանիշի Boeing 737- ը «Ֆուհլսբյութել» օդանավակայանում վայրէջք կատարելուց հետո արհմիությունը հայտարարություն է տարածել այն մասին, որ ինքնաթիռը պատկանում է «հենց այն Լուկաշենկոյին, որը Բելառուսում ցուցարարների վրա կրակելու հրաման է տվել»:
«Մենք՝ Lufthansa Technik ընկերության ակտիվիստներս, չենք մոռանում միջազգային համերաշխության հին ավանդույթը և սատարում ենք բելառուս աշխատավորներին», – ասված է ընկերության արհմիության թռուցիկում:
Բացի այդ, թռուցիկում ներառված են եղել «Լուկաշենկոյի հրաժարականի», «իրական ժողովրդավարական ընտրություններ անցկացնելու», ինչպես նաև «քաղբանտարկյալների ազատ արձակման և աշխատանքը կորցրած գործընկերների վերականգնման» վերաբերյալ պահանջներ։
