ՀՀ օրենսդրության համաձայն՝ ձեռնարկությունների լուծարումը շատ բարդ, շատ ժամանակատար, շատ թղթատար ու շատ ծախսատար գործընթաց է, սակայն ձեռնարկություններ կան, որ գրանցվել են ու չեն գործում կամ արդեն երկար ժամանակ է՝ չեն գործում:
«Առաջին լրատվականի» հետ զրույցում Փոքր ու միջին ձեռնարկատիրության հիմնադրամի գործադիր տնօրեն Նարինե Մայիլյանը նշեց, որ ձեռնարկությունը լուծարելն ինքը խնդիր է. պետք է պարզել՝ արդյոք ձեռնարկությունը պարտք ու պահանջ չունի՞, պետական մարմինների հետ խնդիրներ չունի՞, սակայն, ըստ նրա, եթե երկար ժամանակ չի գործել կամ գրանցվելուց հետո չի գործել, պետք է որ նման խնդիրներ չունենա: Ն. Մայիլյանի կարծիքով, գոնե նման դեպքերում պետք է պարզ ընթացակարգերով լուծարում իրականացնել:
«Խնդիրն այն է, որ պարզ ու հստակ վիճակագրական տվյալներ լինեն գործող ձեռնարկությունների մասին: Եթե ուսումնասիրվեն, ի հայտ բերվեն այն ձեռնարկությունները, որոնք պարզ ընթացակարգով ենթակա են լուծարման, դա կբացահայտի նաև շատ լուրջ տեղեկատվություն մեր երկրում ՓՄՁ-ների գործունեության դժվարությունների մասին»,- նշեց Ն. Մայիլյանը:
Ձեռնարկությունների գրանցման դեպքում, Ն. Մայիլյանի խոսքով, խնդիրը մեծ չի. գրանցման ժամանակ ձեռնարկություններին և անհատ ձեռնարկատերերին հարկային հաշվառման համար են տրամադրում, սակայն Սոցապհիմնադրամում հաշվառման համար չեն տրամադրում. «Գրանցումը հռչակված է 1 պատուհանի գործընթաց, բայց քանի որ սոցապի համարի խնդիրը լուծված չէ, մարդիկ ստիպված են դիմել նաև այլ կառույցի»:
Նշենք, որ գործող 82.5 հազար կազմակերպությունների 99%-ը գերփոքր, փոքր կամ միջին են: ՊԵԿ-ում գրանցված տնտեսվարողները շատ ավելի շատ են՝ շուրջ 150 հազար: ՓՄՁ-ներն ապահովում են ՀՆԱ-ի մոտ 40%-ը, բյուջեի մուտքերի 25-30%-ը:
