«Առաջին լրատվական»-ի զրուցակիցն է Արցախի նախագահ Արայիկ Հարությունյանի՝ արտաքին հարաբերությունների գծով խորհրդական Դավիթ Բաբայանը։
– Պարոն Բաբայան, ինչպե՞ս եք գնահատում Մոսկվայում անցկացված Լավրով-Մնացականյան հանդիպման արդյունքները։ Ռուսաստանը ջանքեր է թափում հրադադարի հաստատման ուղղությամբ, բայց տպավորություն է, որ առայժմ անարդյունք։ Ի՞նչ զարգացումներ են հնարավոր։
– Մենք տեսնում ենք, որ ՌԴ-ն շատ ակտիվ աշխատանք է տանում, որպեսզի տարածաշրջանում վերականգնվի խաղաղությունը։ Մոսկվան ամենաակտիվ ջանքերն է տանում, ու բնական է, որ այստեղ և՛ ԱՄՆ-ը, և՛ Ֆրանսիան՝ որպես Մինսկի խմբի եռանախագահության անդամներ, ինչ-որ տեղ վստահում են Ռուսաստանին։ Եվ դա ճիշտ է, որովհետև Ռուսաստանն ունի համապատասխան ներուժ ու ազդեցության լծակներ խաղաղություն ու կայունություն վերականգնելու համար։ Դա շատ դժվար է, քանի որ Թուրքիա գոյություն ունի։ Բայց մենք տեսնում ենք, որ այս ուղղությամբ շատ մեծ աշխատանք է կատարվում։ Քաղաքական առումով որոշումը կայացված է, որ պետք է զինադադար հաստատվի՝ հոկտեմբերի 10-ի պայմանավորվածության հիման վրա։ Բայց քանի որ այս հակամարտությունը ռազմաքաղաքական ու աշխարհաքաղաքական է, պետք է նաև ռազմական առումով ջանքեր գործադրվեն։ Մենք տեսնում ենք, որ կամաց-կամաց գնում է դրան։ Արդեն Շոյգուն է սկսել բանակցությունները, իսկ դա արդեն նշանակում է, որ շատ լուրջ է։ Մենք անպայման կտեսնենք արդյունքները։ Այս ամենը շատ կարևոր է, որպեսզի վերականգնվի զինադադարի ռեժիմը, սա հազարավոր մարդկանց կյանքեր է փրկելու ճակատի երկու հատվածում էլ՝ և՛ այստեղ, և՛ այնտեղ։ Բնական է, որ մենք առաջին հերթին մտածում ենք մեր զինվորների, մեր երեխաների ապագայի մասին։ Զորքն ամուր կանգնած է, պայքարում է, պետք է նաև ամեն ինչ անենք, որպեսզի դիվանագիտական դաշտում ունենանք համապատասխան առաջընթաց։
– Ստացվում է, որ միակ երկիրը, որը գործնականում ի զորու է ինչ-որ բան անելու, Ռուսաստանն է։
– Դա միայն իմ կարծիքը չէ, դա իրականություն է։ Փաստորեն ԱՄՆ-ը իր հայտարարությամբ ընդունում է դա ու ասում՝ դուք զբաղվեք դրանով։ Երբ ՆԱՏՕ-ի անդամ երկիր Թուրքիան իրեն թույլ է տալիս առանց ավագ գործընկերոջը տեղյակ պահելու մտնել այս պատերազմի մեջ, սա նաև մարտահրավեր է ԱՄՆ-ին։ Սա ցույց է տալիս, որ ԱՄՆ-ը թուլացել է, իր պահվածքով հարված է հասցնում ԱՄՆ-ին։ Հասկանալի պատճառներով ԱՄՆ-ը տարածաշրջանից հեռու է, ո՞վ զբաղվի այս ամենով։ Ֆրանսիան շատ կոշտ հայտարարություն է արել, դա էլ է հարկավոր, բայց պրակտիկորեն ամենամեծ և արդյունավետ ջանքերն այս պահի դրությամբ ներդնում է Ռուսաստանի Դաշնությունը։ Հիմա այդ սպեկուլյացիաների ժամանակը չէ։ Յուրաքանչյուր վայրկյան կարևոր է մարդկային կյանք փրկելու համար։
– Վտանգ չկա՞, որ այս միջնորդության գինը կարող է խաղաղապահ զորքերի տեղակայումը լինել։
– Խաղաղապահների մասին խոսելը դեռևս վաղաժամ է, պետք է մտածենք՝ ինչ է լինելու հետագայում։ Մենք պետք է մարդկանց կյանքերը փրկենք։ Մի բան ակնհայտ է՝ Թուրքիան այստեղ է և կամովին դուրս չի գալու Անդրկովկասից։ Սա նոր իրողություն է, մենք շահարկումներից պետք է հեռու մնանք։ Մեր պետականության ու մեր ժողովրդի ֆիզիկական բնաջնջման վտանգն ավելացել է։ Մտնենք դիսկուրսների դաշտ՝ արևմտամետներ, ռուսամետներ… հոգնել ենք, դա էլ է բերել սրան։ Պետք է ամեն ինչ անենք, որպեսզի լինի խաղաղություն, կայունություն հաստատվի, մնացածը՝ հետագայում։
