Այս պահի դրությամբ՝ սահմանին իրավիճակն այնքան էլ հանգիստ չէ, տարբեր ուղղություններով, մասնավորապես տեղեկություններ ունենք, որ հարավային ուղղությամբ հակառակորդը շարունակում է հրետանային կրակ վարել մեր դիրքերի ուղղությամբ: Այս մասին «Առաջին լրատվական»-ի հետ զրույցում ասաց Արցախի նախագահի մամուլի խոսնակ Վահրամ Պողոսյանը:
Քիչ առաջ տեղեկություն հայտնվեց, որ Ալիևը հայտարարել է Լեռնային Ղարաբաղի հետ անհապաղ բանակցություն սկսելու պաշտոնական Բաքվի պատրաստակամության մասին: Անդրադառնալով այս դիտարկմանը՝ Վահրամ Պողոսյանը նշեց, որ Ալիևը չէր տիրապետում իրավիճակին. «Ալիևը ի սկզբանե չէր տիրապետում իրավիճակին, դա պարզ դարձավ պատերազմի հենց առաջին օրերին, երբ հակառակորդը ոչ միայն ձախողեց իր նախնական պլանները, այլ նաև հանդիպելով մեր ՊԲ հուժկու հարվածներին՝ կորցրեց իր ռազմական ներուժի գրեթե կեսը, եթե ոչ ավելին:
Այն բանից հետո, ինչ տեղի է ունեցել մարտադաշտում, ինչ ստացել է Ադրբեջանը ռազմաճակատում, ենթադրելի էր, որ Ադրբեջանը բանակցային սեղանի շուրջ նստելու «պատրաստակամություն» պետք է հայտնի, որովհետև այլընտրանք Ադրբեջանն այսօր չունի: Հակառակ դեպքում, եթե լայնամասշտաբ գործողությունները Ադրբեջանը շարունակի, ապա միայն ու միայն կազմալուծվելու է նրա բանակը, և մենք՝ բոլորս, տեսնելու ենք ադրբեջանական զորքերի խուճապահար նահանջը»:
Մանրամասն՝ տեսանյութում:
