2009 թ. դեկտեմբերի 31-ի դրությամբ կուտակած հարկային պարտավորություններ՝ շահութահարկի, հաստատագրված վճարի, տարեկան պետական տուրքի և պարտադիր սոցիալական ապահովության վճարների մասով, ունեցողները հարկային պարտավորությունների մարման ժամանակացույց կարող են կնքել մինչև օգոստոսի 20-ը: ՊԵԿ լրատվական ծառայությունից հայտնում են, որ պայմանագրի կնքման և ապառքի գումարի փաստացի վճարման դեպքում տնտեսվարող սուբյեկտն ազատվում է հարկային օրենսդրությամբ այդ պարտավորության գծով արդեն իսկ հաշվարկված տույժերից և տուգանքներից: Օրենքն ուժի մեջ է մտել հուլիսի 4-ից:
Հարկային տեսչությունները հարկ վճարողներին բաժանել են իրազեկման թերթիկներ: Հարկային ապառքը տնտեսվարող սուբյեկտները կարող են վճարել մաս-մաս. մինչև 50 միլիոն դրամ հարկային պարտավորություն ունեցող հարկ վճարողների հետ ժամանակացույցը կնքվում է 10 ամիս, իսկ 50 միլիոն և ավել գումարի դեպքում՝ 24 ամիս մարման ժամկետով, համամասնաբար՝ ապառքի գումարի առնվազն մեկ տասներորդ մասի և մեկ քսաներկուերորդ մասի չափով:
ՊԵԿ-ը զգուշացնում է, որ հարկային արտոնությունների ժամանակացույցից օգտվել չցանկացող կազմակերպությունների նկատմամբ դատական գործընթաց կսկսվի՝ բռնագանձումից՝ ընդհուպ մինչև սնանկացում:
Նշենք, որ 2010 թ. հունվարի 1-ի դրությամբ, տարբեր ժամանակահատվածներում առաջացած՝ չվճարված հարկային պարտավորությունների ընդհանուր գումարը կազմում է ավելի քան 200 միլիարդ դրամ, որից 104 միլիարդը հարկի մայր գումարն է, մնացած 96 միլիարդը՝ տույժ և տուգանքները:
