Լեռնային Ղարաբաղից հայկական ուժերի դուրսբերման ժամանակացույց ներկայացնելու մասին Ադրբեջանի պահանջը հազիվ թե իրագործելի է: Այս մասին չորեքշաբթի օրը հայտարարել է ԵՄ արտաքին քաղաքականության և անվտանգության հարցերով գերագույն ներկայացուցիչ Ժոզեպ Բորելը՝ ելույթ ունենալով Եվրախորհրդարանի նստաշրջանում, որտեղ Ղարաբաղի վերաբերյալ լսումներ են անցկացվել:
«Իրավիճակը տարածաշրջանում վատանում է: Հեռախոսազրույցում Ադրբեջանի արտգործնախարարը ներկայացրել է իրենց պահանջները Հայաստանին` Ղարաբաղում հակամարտությունն ավարտելու դիմաց: Խոսքը վերաբերում է տարածաշրջանից հայ զինվորականների դուրսբերման ժամանակացույցի ներկայացմանը, ինչը հազիվ թե իրագործելի է»,- ասել է Բորելը:
Բորելը նաև նախազգուշացրել է հակամարտության մեջ օտարերկրյա խաղացողների ներգրավման վտանգի մասին և ասել է, որ տարածաշրջանում շատ կեղծ տեղեկություններ են շրջանառվում՝ ուղղված հակամարտության կողմերի բնակչության համախմբմանը և արտաքին աջակցություն ներգրավելուն: Նա կոչ է արել մեծ զգուշությամբ վերաբերվել հակամարտության գոտուց եկող տեղեկատվությանը, հատկապես ԵԱՀԿ դիտորդական առաքելության դադարեցման համատեքստում: Բորելն իր խոսքում ուղղակիորեն չի նշել Թուրքիայի կողմից Սիրիայից տարածաշրջան իսլամիստներ տեղափոխելու մասին տեղեկությունները, որոնք ավելի վաղ արդեն հաստատել էին նույնիսկ ԵՄ մի շարք երկրներ, մասնավորապես Ֆրանսիան:
Բորելը վերահաստատել է ԵՄ դիրքորոշումը՝ ռազմական գործողությունների անհապաղ դադարեցման և ԵԱՀԿ Մինսկի խմբի շրջանակում հակամարտության կարգավորման նոր ջանքերի վերաբերյալ:
Եվրախորհրդարանի նստաշրջանում քննարկման ժամանակ շատ եվրոպացի պատգամավորներ կարծիք են հայտնել, որ Ղարաբաղում հակամարտությունն արդյունք է Թուրքիայի նախագահի`Օսմանյան կայսրությունը մասամբ վերակենդանացնելու փորձերի` Թուրքիայի ազդեցությունը տարածելով հարևան շրջաններում`լինի դա Սիրիա, Լիբիա, Արևելյան Միջերկրական ծով կամ Կովկաս:
