Իսրայելի պաշտպանության նախարար Բենի Գանցը քննադատել է Թուրքիայի ռեգիոնալ կայունությանը սպառնալիք ստեղծելու համար: Բայց պետք չէ շտապել եզրակացնել, թե Իսրայելը ուշքի է գալիս կովկասյան ռեգիոնում պատերազմի հրձիգի իր կարգավիճակից: Իսրայելի պաշտպանության նախարարի խոսքը վերաբերում է մերձավորարևելյան ռեգիոնին: Գանցը լրագրողների հետ զրույցում ասել է, որ Թուրքիան, քննադատելով արաբ-իսրայելական հարաբերության կարգավորման գործընթացը, կապեր պահելով ՀԱՄՄԱՍ-ի հետ, միջամտելով Լիբիայում, ռեգիոնը հեռացնում է կայունությունից: Ըստ ամենայնի, հենց այդ նպատակով էլ Իսրայելը փորձում է ապակայունությունը հեռացնել Կովկաս՝ այստեղ Ադրբեջանի միջոցով Թուրքիայի սանձազերծած ահաբեկչական պատերազմի պայմաններում բարեխղճորեն և սառնասրտորեն շարունակելով մահաբեր սպառազինության մատակարարումները Բաքու: Եթե Թուրքիան պատերազմում է Կովկասում, ապա դա նշանակում է, որ նվազում է Իսրայելի քթի տակ պատերազմելու հավանականությունը: Միաժամանակ, Իսրայելի համար աճում է Թուրքիայի վրա եղած բացահայտ պատասխանատվությամբ սանձազերծված պատերազմի պայմաններում Իրանի և Ռուսաստանի «քթի տակ» ավելի հարմար սողոսկելու և տեղավորվելու հնարավորությունը: Եթե Ադրբեջանն ու Ալիևը դարձել են գործիք Էրդողանի համար, ապա Էրդողանը, թերևս, Իսրայելի գործիք դառնալու ճանապարհին է, և անգամ դրա ավելի քան կեսին:
Էրդողանը ծրագրում է աշխարհի վրա հնարավորինս թանկ վաճառել Ալիևին, Իսրայելը՝ աշխարհի վրա հնարավորինս թանկ վաճառել Էրդողանին: Երուսաղեմի թուրքական քաղաք լինելու մասին Ռեջեփ Թայիփի հոխորտանքը այդ հանգամանքի գիտակցումն է անշուշտ: Բայց մի բան է գիտակցելը, մեկ այլ բան՝ հետևությունը՝ ինչ անել «չվաճառվելու» համար: Էրդողանը կարող է միայն հոխորտալ Թել Ավիվի վրա, ոչինչ ավելին: Փոխարենը, Իսրայելին հաջողվեց Թուրքիային մերձավորարևելյան և միջերկրածովյան ռեգիոններից տեղափոխել Կովկաս՝ իր ահաբեկչական պոտենցիալով: Ճահիճ, որտեղ, խոշոր հաշվով, նույնիսկ դա ստեղծող Թուրքիային չի շողում որևէ հեռանկար:
Թուրքիայի համար այդ ճահճացումը լինելու է ինքնաոչնչացում, պարզապես Իսրայելն այդ գործը փորձում է անել՝ հնարավորինս հեռացնելով իր սահմանից, իրենից հեռացնելով Թուրքիայի աշխարհաքաղաքական «պայթեցումը»:
Եվ դա արվում է հայ զինվորների կյանքերի հաշվին, որոնք կենաց-մահու կռիվ են տալիս Կովկասը ահաբեկչական ճահճի վերածելու հեռանկարից փրկելու համար: Հայ ժողովուրդը, անշուշտ, չի մոռանա Իսրայելի այդ մահաբեր դերակատարումը, որքան էլ իրականություն դառնա նախօրեին հրապարակված տեղեկությունը, թե երկու-երեք օր անց Իսրայելը կդադարի սպառազինության մատակարարումը Բաքվին:
