Ռուսաստանի, Ֆրանսիայի և Միացյալ Նահանգների ԱԳՆ ղեկավարները եռակողմ հայտարարություն են տարածել Լեռնային Ղարաբաղում տիրող իրավիճակի վերաբերյալ, փաստաթուղթը հրապարակվել է ԱԳՆ կայքում:
Հայտարարության մեջ նշվում է, որ Սերգեյ Լավրովը, Ժան-Իվ Լե Դրիանը և Մայք Պոմպեոն «խստորեն դատապարտում են Լեռնային Ղարաբաղի հակամարտության գոտում և դրանից դուրս բռնության աննախադեպ և վտանգավոր սրումը»:
«Վերջին հարձակումները, երբ, ենթադրաբար, թիրախավորվել են քաղաքացիական օբյեկտներ, ինչպես շփման գծի երկայնքով, այնպես էլ Լեռնային Ղարաբաղի հակամարտության գոտուց դուրս Ադրբեջանի և Հայաստանի տարածքներում, ինչպես նաև նման հարձակումների անհամաչափությունը, տարածաշրջանում կայունության համար անընդունելի սպառնալիք են հանդիսանում»,- ընդգծել են փաստաթղթի հեղինակները:
Հղում անելով երեք երկրների ղեկավարների՝ ԵԱՀԿ Մինսկի խմբի համանախագահների հոկտեմբերի 1-ի հայտարարությանը, նախարարները կրկին կողմերին անհապաղ ու անվերապահորեն կրակի դադարեցման կոչ են արել:
Ընդգծվում է, որ Ռուսաստանը, Ֆրանսիան և Միացյալ Նահանգները կշարունակեն ընդլայնել փոխգործակցությունը հակամարտող կողմերի հետ և կոչ անել նրանց հիմնարար սկզբունքների և միջազգային փաստաթղթերի հիման վրա խաղաղ կարգավորման գործընթացը վերսկսելու պարտավորություններ ստանձնել:
Հոկտեմբերի 1-ին Ռուսաստանի, Միացյալ Նահանգների և Ֆրանսիայի ղեկավարները հակամարտող կողմերին կոչ են արել դադարեցնել ռազմական բախումները, պարտավորվել առանց նախապայմանների բանակցություններ սկսել, դատապարտել են սրացումը, ինչպես նաև ցավակցություն են հայտնել զոհվածների և վիրավորների հարազատներին:
