Ակնհայտ է, որ ռուս-ամերիկյան հարաբերությունները զարգանում են բացասականի դաշտում: Այսպիսի եզրակացության է եկել ռուսական Коммерсант թերթը՝ պարզելով, որ ի պատասխան ԱՄՆ-ի կողմից «Մագնիտսկու գործով» մեղավոր պաշտոնյաների նկատմամբ պատժամիջոցներ սահմանելուն, Կրեմլը պատրաստում է պատասխան ցուցակը, որտեղ ընդգրկված կլինեն ՌԴ կողմից «մերժելի» անձինք:
Այս մասին թերթին ասել է Կրեմլի մամլու խոսնակ Նատալյա Տիմակովան: Նա նաև ասել է, որ ԱՄՆ պետքարտուղարության կողմից արված քայլը զարմանք է առաջացրել պաշտոնական Մոսկվայում, քանի որ նրանք չեն սպասել դատարանների որոշմանը:
Հիշեցնենք, որ ամերիկյան Hermitage Capital ընկերության փաստաբան Մագնիտսկու սպանությունից հետո Արևմուտքը լուրջ հարցեր է բարձրացրել պաշտոնական Մոսկվայի դեմ: Ընդունվել են համապատասխան բանաձևեր, իսկ հիմա էլ պետքարտուղարությունը պատժամիջոցներ է կիրառել Մագնիտսկու գործը սքողելու, պարտակելու, նրա սպանության մեջ մեղավոր անձանց նկատմամբ:
