Նոր ուսումնական տարվան թեև հաշված օրեր են մնացել, բայց Մայր բուհը դեռևս ռեկտոր չունի: Օրերս վարչապետը հաստատեց ԵՊՀ հոգաբարձուների խորհրդի նոր կազմը: Թեմայի շուրջ զրուցելու համար «Առաջին լրատվական»-ը հյուրընկալել է ԵՊՀ մամուլի խոսնակ, բանասիրական գիտությունների թեկնածու Գևորգ Էմին-Տերյանին և ԵՊՀ դոցենտ Մենուա Սողոմոնյանին:
Ինչպես նշեց Մենուա Սողոմոնյանը՝ ԵՊՀ հոգաբարձուների խորհրդի նոր կազմի ձևավորման հետաձգման պատճառն այն էր, որ պետք է ձևավորվեր այնպիսի կազմ, որը կկատարեր ցանկացած հրահանգ՝ հատկապես կապված ԵՊՀ ռեկտորի ընտրության հետ. «Շատ տխուր է, որ սկզբում որոշվում է, թե ով պետք է դառնա ռեկտոր, և որոշվում է մեկ, երկու, երեք անձի կողմից, իսկ այնուհետև, ըստ այդմ, ձևավորվում է հոգաբարձուների խորհուրդ՝ կարծես այդ խորհրդի կարևորագույն ֆունկցիան ռեկտորին քվեարկելն է»:
Գևորգ Էմին-Տերյանն էլ հավելեց, որ հոգաբարձուների խորհուրդը համալսարանի բարձրագույն կառավարման մարմինն է և հաստատում է բյուջեն, ռեկտորի հաշվետվությունը, որոշում է ռազմավարական զարգացման ծրագիրը և այլն, մինչդեռ մեկուկես տարվա ընթացքում գումարվել է ընդամենը 5-6 նիստ. «Գուցե մարդիկ ուզում են, որ ավելի լավ լինի, բայց չեն կարողանում այդ ավելի լավը կազմակերպել: Ի վերջո, դեմքերի փոփոխություններից իրողությունները չեն փոխվում. մենք տեսնում ենք նույնաբովանդակ իրողություններ, ինչ կար նախորդ իշխանությունների ժամանակ»:
Նրա խոսքով՝ ԿԳՄՍՆ-ն ինչ քայլ էլ անում է, հիմքում ընկած է հովանավորչությունը:
Հարցազրույցն ամբողջությամբ՝ տեսանյութում:
