Օրեգոն նահանգից ընտրված կոնգրեսական Դևիդ Վուն երեկ հայտարարել է, որ հրաժարական է տալիս, քանի որ ներքաշվել է սեռական սկանդալի մեջ: Այս մասին հաղորդում է France Presse գործակալությունը: Կոնգրեսականն ասել է, որ իր հրաժարականից հետո մտադիր է զբաղվել իրեն ուղղված մեղադրանքների հերքմամբ, որոնք հայտնվել են The Oregonian թերթում: Հոդվածագիրը նրան մեղադրել է 18-ամյա աղջկա բռնաբարության մեջ:
«Ես չեմ կարող շարունակել հոգ տանել ընտանիքիս համար այնպես, ինչպես կցանկանայի, քանի դեռ աշխատում եմ Կոնգրեսում և պայքարում եմ լրջագույն մեղադրանքների դեմ»,- ասել է Վուն: Անցյալ երկուշաբթի Վուի կոնգրեսական գործընկերներից մի քանիսը կոչ են արել քննել այս մեղադրանքները և անդրադառնալ խնդրին: The Oregonian-ի տեղեկություններով՝ Վուն ընդունում է, որ իր և իր ընկերոջ դստեր միջև կապ եղել է, սակայն պնդում է, որ դա եղել է փոխադարձ համաձայնությամբ: Նախկինում էլ Վուն ներքաշված է եղել սեռական բնույթի սկանդալների մեջ:
Տեղեկացնենք, որ 1998 թ. Վուն դարձել է չինական ծագմամբ առաջին ամերիկացին, որը հաջողել է ընտրվել Ներկայացուցիչների պալատ:
