Ադրբեջանի նախագահի աշխատակազմի արտաքին հարաբերությունների պատասխանատու Հիքմեթ Հաջիևը հայտարարել է, թե Բաքուն չի կարող անվերջ մասնակցել բանակցության իմիտացիային: Ի՞նչ ենթադրություններ կարելի է անել այս հայտարարությունից: Թեմայի շուրջ «Առաջին լրատվական»-ի հետ քննարկմանը մասնակցեցին ԱԺ «Իմ քայլը» խմբակցության պատգամավոր Հովիկ Աղազարյանը և Հայ կառուցողական կուսակցության նախագահ Անդրիաս Ղուկասյանը:
Անդրիաս Ղուկասյանի խոսքով՝ պարբերաբար Բաքուն դժգոհություններ է հայտնում Մինսկի խմբի համանախագահների առաջարկների վերաբերյալ և հիմա կարծես թե կրկնվում է հերթական ցիկլը: «Ադրբեջանը իր դժգոհությունն է ներկայացնում, ակնհայտ է, որ դա կապված է նաև Տավուշի սահմանային գոտում տեղի ունեցած իրադարձությունների հետ. Ադրբեջանը սպասում էր, որ Հայաստանին դատապարտող հայտարարություն պետք է հնչեր, բայց դա շեղավ, և այդ հիասթափությունը Ադրբեջանն արտահայտում է նման հայտարարությունով: Բանակցային գործընթացում և ընդհանրապես արտաքին աշխարհի հետ հարաբերություններում հնարավոր արմատական փոփոխությունների առումով ավելի նշանակալի դեր կարող է ունենալ Մամեդյարովի հրաժարականը և այդ պաշտոնում ավելի ագրեսիվ դիրքերից հանդես եկող, ավելի պրոթուրքական կողմնորոշում ունեցող անձի՝ կրթության նախարարի նշանակվելը»:
Տավուշում ստացած հարվածը՝ ի պատասխան սադրանքի, Բաքվին առերեսեց մի շարք խնդիրների հետ: Հովիկ Աղասարյանը նշեց, որ «բանակցությունների իմիտացիա» ձևակերպման հետ համամիտ չէ: Նա նաև հիշեցրեց, որ շրջանառության մեջ է վարչապետ Ն. Փաշինյանի ներկայացրած հետևյալ թեզը. «Արցախի հարցի լուծումը պետք է ընդունելի լինի Արցախի, Հայաստանի և Ադրբեջանի ժողովուրդների համար»: Այս բանաձևի մի մասի հետ Ադրբեջանը համաձայն է, այսինքն՝ Արցախի հարցի լուծումն այնպիսին պետք է լինի, որ ընդունելի լինի Ադրբեջանի ժողովրդի համար…»:
Անդրադառնալով դիտարկմանը, որ Տավուշի սահմանին տեղի ունեցածը բնականաբար դժգոհություն էր առաջացնելու Ադրբեջանի և Թուրքիայի մոտ, բայց Հայաստանում ևս եղան ուժեր, որոնք տխրեցին հայ զինվորների սխրանքից, Հովիկ Աղասարյանը նշեց. «Կան մարդիկ, որոնք իրենց գնահատականներով ու մեկնաբանություններով չեն թաքցնում իրենց տխրությունը, դա անհավատալի է և շատ ցավալի… Հայրենիքի պաշտպանությունը չպետք է քաղաքական շահարկումների առիթ դառնա… Իշխանության որդեգրած քաղաքականության փոքրիկ հաջողությունները քաղաքական հակառակորդների համար անընդունելի են. որոշ ուժեր այդ առումով ջախջախիչ հարված ստացան»:
Անդրիաս Ղուկասյանի դիտարկմամբ՝ ռևանշիստական ուժերը սխալ հաշվարկ էին արել, նրանք կարծում էին, որ արտաքին քաղաքական տիրույթում Հայաստանը կհայտնվի ճգնաժամի մեջ, և իրենք հանդես կգան որպես «կրիզիս մենեջեր», բայց այդ ուժերը ֆիասկո ապրեցին:
Մանրամասն՝ տեսանյութում:
