Որոշ բրիտանացիների համար առանց ինտերնետ կապի մնալը հավասարազոր է ծխելուց կամ ալկոհոլից հրաժարվելուն: Այս մասին հաղորդում է The Daily Mail-ը: Սպառողական ոլորտում անցկացված հետազոտության արդյունքում պարզվել է, որ Մեծ Բրիտանիայի բնակիչների 53%-ը տրամադրության անկում է ունենում, իսկ 40%-ը միայնակ է զգում, երբ զրկվում են ինտերնետ կապից: Հարցախույզն անցկացրել է Intersperience ընկերությունը, որին մասնակցել է մոտ 1000 մարդ:
Հարցվածներից մեկը նույնիսկ նշել է, որ ինտերնետի բացակայության ժամանակ ինքն իրեն զգում է այնպես, կարծես կտրել են իր ձեռքը: «Ցանցային և թվային տեխնոլոգիաներն ավելի շատ են ներխուժում մեր առօրյա կյանք՝ ազդելով ընկերության, շփվելու միջոցների, ընտանիքում և աշխատավայրում մեր հարաբերությունների, որպես գնորդի՝ մեր սովորությունների և ընկերությունների հետ մեր հարաբերությունների վրա»,- The Daily Telegraph-ին ասել է Intersperience ընկերության ղեկավար Փոլ Հադսոնը:
