Ինչպես հաղորդում է Ազատություն ռադիոկայանը, Հայ ազգային կոնգրեսի (ՀԱԿ) հետ երկխոսելու նպատակով ստեղծված իշխանական պատվիրակությունը երկուշաբթի օրը Ազգային ժողովում խորհրդակցություն է անցկացրել: Իշխանական կոալիցիայի պատվիրակները առայժմ խուսափում են մանրամասնել, թե ինչ հարցեր են քննարկել:
Պատվիրակության ղեկավար, ԱԺ-ի Պետաիրավական հարցերով մշտական հանձնաժողովի նախագահ Դավիթ Հարությունյանը «Ազատություն» ռադիոկայանին փոխանցեց, որ իրենց հանդիպումը փակ է: Հանրապետական կուսակցությունը ներկայացնող մյուս պատվիրակը՝ Գագիկ Մինասյանը ևս հրաժարվեց որևէ տեղեկատվություն տալ՝ ասելով, որ բոլոր հարցերին կպատասխանեն վաղը:
Վաղը՝ հուլիսի 26-ին կառավարության ընդունելությունների տանը կայանալու է ՀԱԿ-իշխանական կոալիցիա երկրորդ հանդիպումը, որի ընթացքում կողմերը փորձելու են ձևավորել երկխոսության օրակարգը:
ՀԱԿ-ը շարունակում է պնդել, որ իշխանության ներկայացուցիչների հետ հանդիպումը կենտրոնանալու է արտահերթ ընտրությունների անցկացման հարցի վրա, իսկ իշխանության օրակարգը թերևս պարզ կդառնա վաղը:
Անդրադառնալով իշխանական պատվիրակության հետ վաղը կայանալիք հանդիպմանը՝ ՀԱԿ պատվիրակության ղեկավար Լևոն Զուրաբյանը «Ազատություն» ռադիոկայանի հետ զրույցում նշեց, որ այն կարելի է համարել «լիարժեք բանակցությունների առաջին հանդիպում»:
«Որովհետև նախորդ հանդիպման ժամանակ իշխանության պատվիրակության լիազորությունները ճշտված չէին, հասկանալի չէր, թե ինչ հարցեր են իրենք ի վիճակի քննարկել, բայց այդ բոլոր հարցերի պատասխանը ստացվեց, և մենք արդեն անցնում ենք լիարժեք բանակցություններին», – ասաց Զուրաբյանը:
Հարցին, թե հույս ունե՞ն, որ երեքշաբթի օրը կձևավորվի երկխոսության օրակարգը, ինչը չհաջողվեց անել նախորդ հանդիպման ընթացքում, Զուրաբյանը պատասխանեց. – «Նախորդ հանդիպման ընթացքում նման խնդիր չէր էր դրվել: Նախորդ հանդիպման ընթացքում դրվել էր միայն ձևաչափի ճշտման հարց, իսկ հիմա նոր սկսում են լիարժեք բանակցությունները, և, բնականաբար, մենք պետք է քննարկենք, թե ինչպես ենք այդ բանակցությունները կառուցելու, ներառյալ օրակարգի ձևավորման հարցը»:
Ինչպես Զուրաբյանը նշեց, ՀԱԿ-ը, բացի արտահերթ ընտրությունների պահանջից, այլ հարց չի բարձրացնելու.
«Մենք հստակ ասել ենք, որ այն լուծումները, որ մենք բերում ենք որպես օրակարգային հարց, արտահերթ նախագահական և խորհրդարանական ընտրություններն են»,- ասաց նա:
