Միքայել Մինասյանին առաջադրված մեղադրանքի, կալանավորումը որպես խափանման միջոց ընտրելու և Վերաքննիչ դատարանի կողմից այն կրկին քննության վերադարձնելու հետ կապված, մամուլում բազմաթիվ վարկածներ են շրջանառվում։ Մինչդեռ ամեն ինչ շատ պարզ է։
Բանն այն է, որ պետեկամուտների կոմիտեի քննչական վարչությունում իրականացվող քրեական գործի նախաքննության ընթացքում ձեռք բերված բավարար տվյալների հիման վրա 2020 թվականին հարուցվել են քրեական գործեր Սուրբ Աթոռում ՀՀ նախկին դեսպան Միքայել Մինասյանի կողմից առերևույթ կատարված հանրորեն վտանգավոր արարքների դեպքերի առթիվ։
Մեր տեղեկություններով՝ նախաքննության ընթացքում ձեռք բերված ապացույցների հիմքով որոշում է կայացվել Միքայել Մինասյանին Քրեական օրենսգրքի 310.1-րդ հոդվածի 1-ին մասով (հայտարարագրման ենթակա առանձնապես խոշոր չափերի տվյալները թաքցնելը) և 190-րդ հոդվածի 3-րդ մասի 1-ին կետով (առանձնապես խոշոր չափերի հանցավոր ճանապարհով ստացված գույքն օրինականացնելը) որպես մեղադրյալ ներգրավելու մասին։ Այսինքն՝ Միքայել Մինասյանը զբաղվել է փողերի լվացմամբ, օգտագործելով իշխանական լծակները՝ ապօրինի հարստացել է և թաքցրել հայտարարագրման ենթակա տվյալները։
Այսինքն` հիմնավորվել է, որ Մինասյանը, հանդիսանալով հայտարարագիր ներկայացնելու պարտականություն ունեցող անձ, 2017-2018 թթ․ ընթացքում միլիոնավոր դրամի չափով ավելացրել է իր գույքը, որն էականորեն գերազանցել է իր օրինական եկամուտները և ողջամտորեն չի հիմնավորվել դրանք, այսինքն՝ ապօրինի հարստացել է, բայց դա ներկայացված հայտարարագրերում թաքցրել է ու չի հայտարարագրել հայտարարագրման ենթակա առանձնապես խոշոր չափերով գույքի տվյալներ, ինչպես նաև օրինականացրել է հանցավոր ճանապարհով ստացված առանձնապես խոշոր չափերի գույք։
Այս տարվա մարտի 23-ին որոշում է կայացվել Մ․ Մինասյանի նկատմամբ հետախուզում հայտարարելու մասին, և նույն օրը միջնորդություն է ներկայացվել Երևան քաղաքի ընդհանուր իրավասության դատարան՝ մեղադրյալ Մ․ Մինասյանի նկատմամբ կալանավորումը որպես խափանման միջոց կիրառելու մասին, որը դատարանը բավարարել է։
Մեղադրյալ Մինասյանի պաշտպանների կողմից ՀՀ վերաքննիչ դատարան է բողոքարկվել կալանավորումը որպես խափանման միջոց ընտրելու մասին Երևան քաղաքի ընդհանուր իրավասության դատարանի որոշումը, որը Վերաքննիչ դատարանի կողմից բավարարվել է, բեկանվել է և, ըստ մեր ունեցած տվյալների, վերադարձվել է ընդհանուր իրավասության դատարան։
Մեր աղբյուրների փոխանցմամբ՝ ՀՀ վերաքննիչ դատարանը, անդրադառնալով վերաքննիչ բողոքի էությանը, արձանագրել է Առաջին ատյանի դատարանի կողմից թույլ տրված զուտ ընթացակարգային խախտումներ, իսկ Մինասյանին առաջադրված մեղադրանքում Վերաքննիչ դատարանը խախտումներ չի արձանագրել։
