«Առաջին լրատվականի» հետ զրույցում տնտեսագետ Արամ Կայֆաջյանը կարծիք հայտնեց, որ գնանկում կարելի է սպասել հիմնականում գյուղմթերքների գների հետ կապված. «Լուրջ գնանկում չենք տեսնում, ինչպես կցանկանայինք, բայց առաջին եռամսյակի հետ համեմատած որոշ չափով կա: Հատկապես բանջարեղենի, մրգի գներն են իջել»:
Նրա խոսքով, եթե դրամը շարունակի զիջել դիրքերը, դա կարող է բերել ներմուծվող ապրանքների գների որոշակի անկման: Սակայն, ամեն դեպքում, տնտեսագետը գտնում է, որ տարվա կտրվածքով գնանկում չի լինելու, հակառակը՝ գնաճ է լինելու. «Եթե դրամի արժևորման միտումը շարունակվի 360 և ավելի ներքև, դա կազդի բենզինի ու վառելիքի գների վրա, ինչն իր հերթին կբերի որոշ ապրանքատեսակների գների աճի»:
Ա.Կայֆաջյանը նշեց, որ տնտեսության նորմալ զարգացման համար որոշակի գնաճ պետք է լինի, և ԿԲ կանխատեսած 4.5% գնաճը նորմալ է. «Բայց այս տարին կփակենք առնվազն 7.5% գնաճով, եթե, իհարկե, պարենային ապրանքների գներն իջնեն, զարգացումները դրական լինեն և արտարժույթն էլ կայուն լինի»:
