25 տարվա ընթացքում առաջին անգամ փակվել են ԱՄՆ-ի դաշնային բանտերը: Այս մասին հաղորդում է Government Executive-ը՝ հղում անելով ԱՄՆ բանտերի բյուրոյի նամակին:
Իշխանությունները այս որոշումը կայացրել են կապված անկարգությունների և խռովությունների հետ, որոնք երկրում սկիզբ են առել աֆրոամերիկացի Ջորջ Ֆլոյդի մահից հետո:
Նշվում է, որ բանտերը փակ կլինեն անվտանգության նկատառումներից ելնելով, մինչև որ վիճակը կխաղաղվի:
ԱՄՆ բանտերի բյուրոն իր մեջ 122 հաստատություն է ներառում ողջ երկրով մեկ: Դրանցում շուրջ 165,5 հազար մարդ է պահվում և աշխատում է գրեթե 37 հազար մարդ:
Հիշեցնենք, որ ամերիկյան մի շարք քաղաքներում տեղի ունեցող բողոքի ցույցերը սկսվել են մայիսի 25-ին սոցցանցերում մի տեսանյութի տարածումից հետո, որտեղ ոստիկանը Ջորջ Ֆլոյդ անունով աֆրոամերիկացի տղամարդուն պառկեցրել է գետնին ու ծնկով սեղմում է նրա վզին։ Անտեսելով տղամարդու շնչել չկարողանալու մասին խոսքերը՝ ոստիկանը հրաժարվել է նրան բաց թողնել, ինչի հետևանքով Ֆլոյդը մահացել է:
