Ազգային Ժողովի «Իմ քայլը» խմբկցության պատգամավոր, տնտեսական հարցերի մշտական հանձնաժողովի նախագահ Բաբկեն Թունյանը բենզինի ներկրման գծով խնդիրներ է տեսնում և կարծում է, որ պետք է հնարավորինս շուտ լուծում տալ դրանց:
Վերջինս նման հայտարարություն է արել Ազգային Ժողովում «ՀՀ տնտեսական մրցակցության պաշտպանության պետական հանձնաժողովի 2019 թ-ի գործունեության հաշվետվությունը» խորագրով խորհրդարանական լսումների ժամանակ։
Խոսելով բենզինի, դիզվառելիքի շուկայի մասին՝ Թունյանը մասնավորապես ասել է, որ առաջին անգամն է, որ պետական մարմինը՝ ՏՄՊՊՀ-ն, բաց խոսում է միջնորդ օղակի մասին: Որպես խնդիր նշվել է Ռուսաստանից ներկրվող քվոտավորված վառելիքի ձեռք բերման և ներմուծման գործընթացում միջնորդ կազմակերպությունը:
Բաբկեն Թունյանի կարծիքով՝ խոսքը «Ռոսնեֆտ-Արմենիա»-ի մասին է: Պատգամավորը նաև նշել է, որ միասին պետք է քննարկել խնդրի լուծման ճանապարհն ու հնարավորինս արագ փոխել առկա վիճակը։
«Տնտեսական իրավունքի կենտրոն» ՀԿ նախագահ, տնտեսագետ Մովսես Արիստակեսյանը համակարծիք է վերոնշյալ պնդման հետ և իր հերթին համոզված է, որ բենզինի և դիզվառելիքի շուկայում օլիգոպոլիան շարունակվում է։
«Շուկան պահպանվում է այն մասնակիցների միջև, ովքեր եղել են նախկինում։ Ոչինչ չի փոխվել այս առումով։
Ընդհանրապես ՏՄՊՊՀ-ի հաշվետվությունը շատ վատն էր։ Վստահ եմ, որ այս կառույցի գործունեությունն արմատապես պետք է փոխվի։ Մեկ տարի է, որ ՏՄՊՊՀ նախագահը փոխվել է և այս ընթացքում նա առաջին հերթին պետք է նախաձեռնած լիներ օրենքի փոփոխություն։ Ամբիոնից գոռում ու գոչյում էր, որ չի կարողանում ազատ գործել, քանի որ օրենքն է խանգարում, ուրեմն թող օրենքի փոփոխություն առաջարկեր, համապատասխան նախագիծ մշակեր, ոչ թե միայն հայտարարեր ու անցներ առաջ՝ ոլորտն այդպես էլ բարձիթողի վիճակում թողնելով»,- «Առաջին լրատվական»-ի հետ զրույցում շեշտեց Մովսես Արիստակեսյանն ու այս համատեքստում հավելեց նաև․
«Այո, պետք է արմատապես փոխել այդ կառույցի գործառույթները, հետաքննական իրավունքներ պետք է տալ։ Վարչական պատասխանատվությունը, որը կիրառում են շուկայում գերիշխող դիրքի նկատմամբ պարզապես ծիծաղելի է։ Նախկին օլիգարխիային էլի վերցրել է իր հովանու ներքո՝ Սամվել Ալեքսանյան և մյուսներ։ Բոլորս էլ շատ լավ գիտենք նրանց անուններն ու բիզնես գործունեությունները»։
Դիտարկմանը, որ նաև Վատիկանում Հայաստանի նախկին դեսպան, Սերժ Սարգսյանի փեսա Միքայել Մինասյանի անունը նույնպես բազմիցս հիշատակվել է մամուլում՝ որպես այս շուկայում հիմնական դերակատար, տնտեսագետը պատասխանեց․
«Միքայել Մինասյանի մասին փաստական տվյալներ չունեմ։ Այո՛, մամուլը պարբերաբար գրել է այդ մասին, բայց ես ինքս այդ մասով փաստեր չունեմ։ Գիտեմ, որ բենզինի շուկան եղել է ու մնում է Սերժ Սարգսյանի մտերիմ ընկերոջ՝ Բարսեղ Բեգլարյանինը ու իր գործընկերներինը՝ դեռևս 1998-1999 թվերից ու հիմա էլ նրանք են թելադրողները»։
Արիստակեսյանից հետաքրքրվեցինք նաև՝ ինչպե՞ս պետք է փոխել շուկան, վերացնել հիշատակված անձանց մոնոպոլ դիրքն ու խաղի հավասար կանոններ սահմանել բոլոր ներկրողների համար, ՏՄՊՊՀ-ն ի՞նչ անելիքներ ունի այս առումով։
«Այն հայտարարությունները, որոնք արել են թավշյա հեղափոխության առաջնորդները, թե մենաշնորհները վերացել են՝ պետք է վերախմբագրել։ Մենաշնորհները չեն վերացել։ Բոլոր կայսրությունները, կառույցները կան ու քանդված չեն։
Իսկ ինչպես պետք է քանդել՝ այո՛, ապօրինի գույքի բռնագանձման օրենքով պետք է շարժվել, ինչպես նաև պետք է վերափոխել ՏՄՊՊՀ-ի օրենսդրությունը, որով կառույցը կունենա հետաքննություն անելու իրավունք, որպեսզի կարողանա մրցակցության պայմանները խախտողի նկատմամբ ուժեղ և անմիջական ազդեցություն ունենալ ու հավասար պայմաններ սահմանել»,-ընդգծեց մեր զրուցակիցը։
Լուսանկարը՝ Armeniasputnik-ի