ՀՀ շրջակա միջավայրի նախարարության անտառային կոմիտեն հորդոր է հրապարակել։
«Հանրապետությունում ջերմաստիճանի բարձրացման պատճառով, անտառային և հարակից բուսածածկ տարածքներում մեծացել է հրդեհների առաջացման և տարածման վտանգը: Անտառային կոմիտեն ազգաբնակչությանը հորդորում է պահպանել հրդեհային անվտանգության կանոնները, զերծ մնալ արգելված և վտանգավոր վայրերում հրդեհների բռնկմանը նպաստող գործողություններից,- ասված է հայտարարության մեջ:
Հայտարարությունում նաև հետևյալ հիշեցումն է արված՝ արգելքների մասով.
«Հիշեցնում ենք, որ անտառային տարածքներում արգելվում է.
. Կրակ վառել
. Վառվող լուցկի կամ ծխախոտի մնացորդ գցել
. Յուղերով կամ բենզինով ներծծված լաթեր թողնել
. Ներքին այրման շարժիչների աշխատանքի ժամանակ մեքենան վառելիքով լիցքավորել, ինչպես նաև ծխել լիցքավորվող մեքենաների մոտ
. Խարույկ թույլատրվում է վառել միայն դրանց համար նախատեսված վայրերում և վերջում մարել այն
Հարկ ենք համարում հիշեցնել, որ «Մթնոլորտային օդի պահպանության մասին» ՀՀ օրենքի համաձայն` արգելվում է այրել խոզանները, բուսական մնացորդներով ու չորացած բուսականությամբ տարածքները, արոտավայրերի ու խոտհարքերի բուսականությունը գյուղատնտեսական, անտառամերձ, անտառային ու բնության հատուկ պահպանվող հողերում:
Տեղեկացնում ենք, որ գործող օրենսդրությամբ քրեական և առանձնապես խոշոր չափերի հասնող նյութական պատասխանատվություն է սահմանված ինչպես դիտավորությամբ, այնպես էլ անզգուշությամբ անտառային տարածքներին վնաս պատճառելու համար:
Հայտնում ենք նաև՝ հրդեհների կանխարգելման և դրանց ծագման դեպքում կոորդինացված գործողություններ իրականացնելու նպատակով սահմանվել են անտառային հրդեհների կանխարգելման, դրանց դեմ պայքարի միջոցառումները կանոնակարգելու համալիր ծրագրեր։
ՇՄՆ Անտառային կոմիտեի «Հայանտառ» ՊՈԱԿ-ի 18 «անտառտնտեսություն» մասնաճյուղերը կազմել և համապատասխան մարզերի ԱԻՆ փրկարարական վարչությունների պետերի և մարզպետարանների ներկայացուցիչների հաստատմանն են ներկայացրել հակահրդեհային պահպանությունը ուժեղացնելու միջոցառումների համալիր ծրագրեր, ստեղծվել են հակահրդեհային արագ արձագանքման խմբեր։
«Հայանտառ» ՊՈԱԿ-ում ձևավորել է «Հրդեհների արագ արձագանքման և հրդեհաշիջման աշխատանքների կազմակերպման շտաբ», որին են ամրակցվել համապատասխան հակահրդեհային գույք և տեխնիկա։ Շտաբի հետ օպերատիվ կապ հաստատելու նպատակով սահմանվել է թեժ գիծ՝ հետևյալ հեռախոսահամարներով` աշխատանքային ժամերին և օրերին՝ 010/ 65 37 16,65 09 27, շուրջօրյա՝ 093/ 17 72 22 հեռախոսահամարներով»,- ասված է հայտարարության մեջ։
