Այսօր «Սոցիոմետր» սոցիոլոգիական կենտրոնի ղեկավար, սոցիոլոգ Ահարոն Ադիբեկյանից փորձեցինք պարզել, թե երկխոսության փաստը ինչպե՞ս է գնահատում և այն ինչպե՞ս կարող է ազդել քաղաքական ուժերի հանրային վստահության վրա:
Նրա խոսքերով, բոլոր դեպքերում երկխոսությունը նոր մշակույթ է մեր քաղաքականության մեջ: Դա մեր ներքաղաքական մշակույթին և փորձին նոր երանգներ կտա: «Մենք սովոր ենք, որ միշտ սև ու սպիտակ տեսնենք իրար, երկխոսությունը իր հետ նոր երանգներ կբերի: Հետագայում իշխանությանը կտա ավելի լայն կոալիցիա, քան ինքը կոալիցիան էր»,- նշեց Ահարոն Ադիբեկյանը:
Խոսելով խնդիրների մասին՝ նշեց, որ «կոմպրոմիսի» գնալու շատ քիչ պատրաստակամություն կա իշխանության կողմից վաղաժամկետ ընտրությունների գնալու, իսկ ընդդիմության կողմից պարտադիր այդ վաղաժամկետ ընտրությունները օրակարգ դնելու հարցում: Ավելին՝ երկիրը տնտեսական ճգնաժամից հանելու հարցում ո՛չ ներկա իշխանությունները, ո՛չ էլ ընդդիմությունը քայլեր չեն ձեռնարկում: «Այնպես որ, լավ կլիներ, որ այս ամենը վերանայվեր»,- առաջարկեց Ահարոն Ադիբեկյանը:
Ինչ վերաբերում է հանրային վստահությանը՝ ասաց. «Ամեն ընտրող, քանի որ ունի իր դիրքորոշումը, այն զանգվածը, որը կողմ է կոալիցիոն կառավարությունների, և նրանք, ովքեր կողմ էին միայնակ գնալու ընտրությունների՝ մեկի դուրը կգա, մյուսի դուրը չի գա, բայց հիմնականում, նորից եմ ասում, դա բավականին լուրջ երևույթ է: Հանրությունը այս ամենը դեռ պետք է մարսի նոր հետևություններ անի: Հետևաբար՝ ներկա պահին գնահատական տալը ճիշտ չէր լինի»:
