Շուտով կլրանա 8 ամիսը, որ գործ են հարուցել իմ նկատմամբ, բայց որևէ նորություն չկա այդ գործից, ինձ առայժմ ՀՔԾ չեն կանչել: Այս մասին «Առաջին լրատվական»-ի հետ զրույցում նշեց ՀՀ նախկին ոստիկանապետ Ալիկ Սարգսյանը՝ անդրադառնալով «Ժողովուրդ» թերթի հրապարակմանը, թե ՀՀ նախկին ոստիկանապետ Ալիկ Սարգսյանն օրերս դիմել է Հատուկ քննչական ծառայություն և այդ կառույցի հետ ներքին պայմանավորվածություն է ձեռք բերել հանդիպելու և որոշելու, թե ինչ է լինելու իր դեմ հարուցված քրեական գործի ճակատագիրը:
Հարցին՝ ճշտե՞լ է, թե ով է իր դեմ ցուցմունք տվել, նա պատասխանեց. «Ես դրանով հատուկ չեմ ուզում զբաղվել, չեմ ուզում որևէ մեկի հետ հանդիպեմ, հարցնեմ, որ չստացվի, թե ինչ-որ շահագրգռվածություն ունեմ ինչ-որ բաներ ճշտելու: Իմ նախկին կոլեգաներից որևէ մեկին, որոնք անցնցում են էս գործով, չեմ զանգել, չեմ հանդիպել»:
Նախկին ոստիկանապետը չցանկացավ խոսել այսօր ոստիկանության աշխատանքի մասին. «Դրա մասին չեմ ուզում խոսել, թողեք էս վիճակը մի հատ հասկանամ, հետո կզրուցենք: Հիմա դա ինձ պետք չի»:
Ավելի վաղ՝ 2020-ի փետրվարի 17-ին, մամուլը գրել էր, որ ՀՔԾ-ն հարցաքննության է հրավիրել «Մարտի 1»-ի գործով մեղադրյալ, ՀՀ նախկին ոստիկանապետ Ալիկ Սարգսյանին, որը ՀՔԾ-ում «կռիվ է տվել»: ՀՔԾ-ն Ալիկ Սարգսյանին հրավիրել էր և առաջարկել` արդյոք համաձա՞յն է, որպեսզի վաղեմության ժամկետի հիմքով կարճվի իր նկատմամբ հարուցված քրեական գործը: Սակայն Ալիկ Սարգսյանը հրաժարվել է առաջարկից և հիմնավորել՝ իր նկատմամբ մեղադրանք առաջադրվելուց հետո մի օր հարցաքննության չի հրավիրվել, որպեսզի հասկանալի լինի, թե ով է իր դեմ ցուցմունք տվել, ինչ է հայտնել քննիչներին, և դրանց մեջ կա՞ արդյոք ճշմարտության հատիկ, թե՞ ոչ:
Հիշեցնենք, որ ՀՀ նախկին ոստիկանապետ Ալիկ Սարգսյանին մեղադրանք է առաջադրվել 2008 թվականի մարտի 1-2-ն ընկած ժամանակահատվածում Երևան քաղաքում տեղի ունեցած իրադարձությունների վերաբերյալ ՀՀ հատուկ քննչական ծառայությունում քննվող քրեական գործի նախաքննության ընթացքում ձեռք բերված բավարար ապացույցների համակցության հիման վրա։ Մեղադրանքն առաջադրվել է ՀՀ քրեական օրենսգրքի 308-րդ հոդվածի 2-րդ (պաշտոնեական լիազորությունները չարաշահելը, որն անզգուշությամբ առաջացրել է ծանր հետևանքներ), 314-րդ հոդվածի 1-ին (պաշտոնեական կեղծիքը) և 334-րդ հոդվածի 1-ին (հանցագործությունը պարտակելը) մասերով:
Լուսանկարը՝ Armeniasputnik-ի
