Թեպետ աշխարհը կենտրոնացած է կորոնավիրուսի վրա, բայց հետաքրքիր զարգացումներ են տեղի ունենում տարածաշրջանում և ընդհանուր առմամբ Մերձավոր Արևելքում: Վերջին օրերին բավականին թեժ իրավիճակ է ստեղծվել Հայաստանի, հայկական շահի համար շատ կարևոր երկրներից մեկում՝ Լիբանանում, որտեղ մարդիկի դուրս են եկել փողոցներ և բողոքում են տնտեսական ծանր վիճակից, բախումներ են տեղի ունեցել ցուցարարների և կանոնավոր բանակի միջև։ Ցուցարարները կոտրել են Բեյրութի խանութները և բանկերի գրասենյակները։ Այս և տարածաշրջանային կարևորության մի շարք հարցեր «Առաջին լրատվական»-ը քննարկել է արաբագետ Արմեն Պետրոսյանի և «Օրբելի» կենտրոնի փորձագետ Կարեն Վերանյանի հետ:
Պետրոսյանի խոսքերով՝ աշխարհը հոգնել էր համավարակային միապաղաղությունից և, կարծես թե, կարոտել էր նախկին կոնֆլիկտային իրավիճակները, հատկապես Մերձավոր Արևելքում, գրեթե բոլոր կոնֆլիկտային գոտիներում նկատվում են թեժացումներ: «Շարքային լիբանանցին այսօր կանգնած է երկընտրանքի առաջ՝ պայքարել կորոնավիրուսի՞, թե՞ սովի դեմ, տեսնում ենք, որ լիբանանցիներն ընտրել են երկրորդ տարբերակը… Այս ամենը կարող է հանգեցնել առողջապահական համակարգի վատթարացմանը, քանի որ անցած երկու ամիսներին իշխանություններին հաջողվել է վերահսկել վարակի տարածումը, բայց իրավիճակը փոխվել է, և բողոքի գործողությունները հղի են վարակի տարածման ավելի մեծ աղբյուրների ստեղծմամբ»,- ասաց Պետրոսյանը՝ չբացառելով գործող կառավարության հրաժարականի հավանականությունը:
Կարեն Վերանյանն իր հերթին փաստեց, որ Լիբանանի իշխանությունները չեն կարողանում վերահսկողության տակ պահել իրավիճակը, որը պայթյունավտանգ է: «Հայ համայնքի մասով մտավախություն կա նախ և առաջ այն առումով, որ սոցիալ-տնտեսական ծանր խնդիրները չեն կարող շրջանցել հայ համայնքին, առավել ևս Սիրիայում տեղի ունեցող զարգացումները, քաղաքական-ռազմական ճգնաժամը ժամանակ առ ժամանակ տեղափոխվում են Լիբանան: Իհարկե, սիրիահայերի հետ համեմատած, լիբանանահայերն շատ ավելի անվտանգ միջավայրում են գտնվում, բայց, այդուհանդերձ, հնարավոր էֆեկտները հայ համայնքն իր վրա զգում է՝ քաղաքական, ռազմական բախումների մասով»:
Առավել մանրամասն՝ տեսանյութում:
