Ֆեյսբուքյան «Չենք լռելու» երիտասարդական նախաձեռնության անդամները գրեթե 2 շաբաթ է, ինչ բարձրաձայնում էին Սանահին վանական համալիրի անմխիթար վիճակի մասին: Մոտ մեկշաբաթյա լռությունից հետո երեկ մշակույթի նախարարությունը վերջապես արձագանքեց և հայտարարեց մոտ ապագայում համալիրի վերանորոգման մասին:
Սանահին վանական համալիրի պարագայում ֆեյսբուքյան շարժումը նշանակալից արդյունքի հանգեցրեց՝ ընդհուպ մինչև նրան, որ եկեղեցական համալիրի վերանորոգման համար որոշվեց տրամադրել 90 միլիոն դրամ։ Այս առնչությամբ «Առաջին լրատվականը» զրուցեց «Չենք լռելու» նախաձեռնության հիմնադիր, խմբի անդամ Աշոտ Պողոսյանի հետ, ով հայտնեց, որ սոցցանցում խումբ ստեղծելու գաղափարը ծագեց որպես զբոսաշրջիկ Սանահին այցելելուց հետո։
«Որոշեցինք խումբ ստեղծել ու աղմուկ բարձրացնել։ Ու ստացվեց»,- ասաց նախաձեռնության հիմնադիրը՝ խմբի հաջողությունը պայմանավորելով այն հանգամանքով, որ տվյալ դեպքում գործ ունենք համաշխարհային նշանակության մշակութային կոթողի հետ։
«Մյուս դեպքերում գուցե թեման այնքան զորեղ չէր։ Սանահինի վիճակը մեր բոլորիս խայտառակությունն է։ Հուսով եմ, որ ճարտարապետական բոլորն նորմերը կպահպանվեն։ Հույս է ներշնչում այն հանգամանքը, Սանահինը նորոգելու են գերմանացի մասնագետներ»,- ասաց Ա.Պողոսյանը՝ նշելով, որ կան միջնադարյան ճարտարապետության այլ կոթողներ ևս, որոնք գտնվում են «խայտառակ, աղետալի վիճակում»։
«Ցավոք , ո՛չ պետության, ո՛չ այլ կազմակերպությունների կողմից քայլեր չեն ձեռնարկվում դրանք նորոգելու ուղղությամբ»,- հավելեց նա։
Նշենք, որ Սանահինը 1999թ. ՅՈՒՆԵՍԿՕ-ի կողմից ներառվել է համաշխարհային մշակութային ժառանգության ցանկում։
