Վրացի բժիշկները կորոնավիրուսով հիվանդներին բուժելու համար միայն «Պլակվենիլ» պրեպարատը չեն օգտագործում: Նրանք հետեւում են նաեւ աշխարհում կիրառվող նորարարություններին:
Թբիլիսիի ինֆեկցիոն հիվանդանոցի տնօրեն Թենգիզ Ցերցվաձեն պատմել է, թե ինչպես են Վրաստանում բուժում կորոնավիրուսը:
Կորոնավիրուսի բուժման վրացական մեթոդի մասին Ցերցվաձեն որոշել է պաշտոնական հայտարարություն անել այն բանից հետո, երբ ԱՄՆ-ում բնակվող վրացի բժիշկ Զուրաբ Գուրուլին իր Facebook-յան էջում քննադատել էր Վրաստանում կիրառվող բուժման մեթոդները, մասնավորապես քննադատել էր «Պլակվենիլ» պրեպարատի կիրառումը:
Ըստ Ցերցվաձեի, իր հրապարակման մեջ Գուրուլին ասում է, որ վրացական մեթոդի ժամանակ «Պլակվենիլ» են նշանակում իբրեւ թե առանց ախտանիշների հիվանդներին, որոնց համակարգչային տոմոգրաֆիան նորմալ է, եւ դա անթույլատրելի է: Նա նաեւ ասում է, որ «Պլակվենիլը» ոչ մի դեպքում չի կարելի նշանակել կանխարգելիչ նկատառումներից ելնելով:
«Մենք միանշանակ հայտարարում ենէ, որ դա փաստացի 100 տոկոսանոց սուտ է եւ կանխամտածված ապատեղեկատվություն: Պարոն Գուրուլին ստում է եւ ստում է անխղճորեն»,- հայտարարել է Ցերցվաձեն:
Ըստ Ցերցվաձեի, վրացական բուժման արձանագրությունում հստակ գրված է, որ առանց ախտանիների հիվանդները «Պլակվենիլով» բուժման կարիք չունեն, այդ դեղամիջոցը նշանակվում է միայն միջին, ծանր եւ ծայրահեղ ծանրության հիվանդներին: Նաեւ գրված է, որ տվյալ դեղամիջոցի կիրառումը կանխարգելիչ նպատակներով խստիվ արգելվում է: Արձանագրությունը հասանելի է, եւ յուրաքանչյուր ցանկացող հնարավորություն ունի դրա հետ ծանոթանալ Վրաստանի առողջապահության նախարարաության կայքում, նշել է Ցերցվաձեն:
Ցերցվաձեն նաև մեջբերել է մի շարք արտասահմանյան հրապարակումներ, որոնցում կորոնավիրուսի դեմ վրացական պայքարը կոչվում է հաջողակ, ինչպես նաև մեջբերել է ամերիկյան փորձագետ, պրոֆեսոր, վարակաբան և իմունաբան Էնթոնի Ֆաուչիի խոսքերը, որն ապրիլի 15-ին հաղորդագրություն էր ուղարկել վրացի գործընկերներին. «Ես շատ ուրախ եմ, երբ տեսնում եմ, որ Վրաստանը շատ լավ է վերահսկում բռնկումը»:
«Վրաստանում բոլոր հիվանդների բուժումը տեղի է ունենում անհատապես, և մեր հույսը միայն «Պլակվենիլը» չի», – նշել է Ցերցվաձեն՝ հավելելով, որ վրացի մասնագետներն անընդհատ ծանոթանում են այս ուղղությամբ կատարված վերջին հետազոտություններին և տեղյակ են բոլոր նորամուծություններին:
Նա նշել է, որ Վրաստանում հաջողությամբ օգտագործվում է նաեւ Tocilizumab դեղամիջոցը: Օգտագործվում են նաև Lopinavir-ը, Ritonavir-ը, Darunavir-ը և Kobitsistat-ը:
Կենտրոնը պատրաստվում է նաև օգտագործել պլազմաֆերեզ (COVID-19- ից բուժվածից վերցված պլազմա), օզոնային թերապիա և այլ մեթոդներ:
Վրացի մասնագետները մեծ ուշադրություն են դարձնում նաև սիմպտոմատիկ և օժանդակ թերապիայի մեթոդներին և մոտեցումներին:
