Ծնելիության գումարային գործակիցը կամ պտղաբերության գործակիցը բնութագրում է երեխաների միջին թվաքանակը, որ կծնի մեկ կինն իր մանկածնության տարիքում, իր ողջ կյանքի ընթացքում ծնելիության տվյալ մակարդակի պահպանման դեպքում: Ծնելիության ստորև ներկայացվելիք ցուցանիշները վերաբերում են հետազոտությանը նախորդող երեք տարիներին (այսինքն՝ 2007 թ. նոյեմբերից մինչև 2010 թ. նոյեմբեր): Այսպիսով, ըստ ՀԺԱՀ-2010-ի տվյալների, ԾԳԳ-ն կազմել է 1.7 երեխա մեկ կնոջ հաշվով: Այս ցուցանիշը ցածր է բնակչության բնական վերարտադրությունն ապահովող ծնելիության գործակցից, որը պետք է լինի 2.0-ից մի փոքր ավելի բարձր: ՀԺԱՀ-2010 արդյունքում ստացված 1.7 ցուցանիշը նույնն է, ինչ ստացվել էր ՀԺԱՀ-2000 և ՀԺԱՀ-2005 հետազոտությունների արդյունքում:
Այսպիսով, տասնամյակում Հայաստանի Հանրապետությունում ծնելիության համընդհանուր մակարդակի էական փոփոխություններ չեն նկատվել: Այնուամենայնիվ, հավաքագրված տվյալները վկայում են, որ ԾԳԳ-ն որոշակի փոփոխությունների է ենթարկվել ըստ քաղաքային և գյուղական բնակավայրերի: Թեև քաղաքային բնակավայրի ԾԳԳ-ն վիճակագրական տեսանկյունից նույնն է (1.5՝ ՀԺԱՀ-2000 թ. տվյալի համաձայն և 1.6՝ 2005 և 2010 թվականներին), սակայն գյուղական բնակավայրի ԾԳԳ-ն ունի նվազման միտում (2.1՝ ՀԺԱՀ-2000 թ. և 1.8՝ 2005 և 2010 թվականներին):
Ընդհանուր առմամբ, ծնելիության տարիքային գործակիցները մնացել են նույնը, սակայն նկատվել է ծնելիության գործակցի տեղաշարժ՝ 15-19 առավել երիտասարդ տարիքային խմբից դեպի ավելի բարձր՝ մասնավորապես 25-29 տարիքային խումբ։
Ազգային մակարդակով, ՀԺԱՀ 2010 թ. արդյունքում ստացված 1.7 ցուցանիշը փոքր-ինչ բարձր է ՀՀ ազգային վիճակագրական ծառայության կողմից ծնունդների վարչական գրանցումների հիման վրա ստացված պաշտոնական 2009 թ. 1.55 և 2008 թ.՝ 1.4 ցուցանիշներից (ՀՀ ազգային վիճակագրական ծառայություն, 2010):
15-19 տարիքում – ընդհանուր քաղաքային բնակավայրերից մայրացել է՝ 18 , գյուղականից՝ 42 կին,
20-24 տարիքային խմբում – քաղաքային բնակավայրերից՝ 124 , գյուղականից՝ 163 կին,
25-29 տարիքային խմբում – քաղաքային բնակավայրերից՝ 99, գյուղականից՝ 108 կին,
30-34 տարիքային խմբում – քաղաքային բնակավայրերից՝ 43, գյուղականից՝ 40 կին,
35-39 տարիքային խմբում – քաղաքային բնակավայրերից՝ 31 , գյուղականից՝ 12 կին,
40-44 տարիքային խմբում քաղաքային բնակավայրերից՝ 6 կին, իսկ գյուղական բնակավայրերից՝ 3 կին:
Ծնելիության հատուկ գործակիցն արտահայտված է 15-44 տարեկան 1000 կնոջ հաշվով:
