ՀՀ հատուկ քննչական ծառայության պետ Անդրանիկ Միրզոյանն այսօր ընդունել է ԵԽԽՎ Մոնիտորինգի հանձնաժողովի համազեկուցող Աքսել Ֆիշերի գլխավորած պատվիրակությանը: Հանդիպմանը մասնակցել են ՀՀ ՀՔԾ հատկապես կարեւոր գործերով ավագ քննիչ, «Մարտի 1»-ի քրեական գործով քննչական խմբի ղեկավար Վահագն Հարությունյանը, հանձնաժողովի քարտուղար Բաս Քլայնը, Հայաստանի Հանրապետությունում Եվրոպայի խորհրդի գլխավոր քարտուղարի հատուկ ներկայացուցիչ տիկին Սիլվա Զեհեն։
Հանդիպման ընթացքում քննարկվել են 2008 թվականի մարտի 1-2-ին Երեւանում տեղի ունեցած զանգվածային անկարգությունների կապակցությամբ հարուցված քրեական գործի նախաքննության արդյունքներին վերաբերող հարցեր: Ա.Միրզոյանը մանրամասնել է Հայաստանի Հանրապետության Նախագահի հանձնարարականից հետո նշված քրեական գործով կատարված աշխատանքները եւ ընդգծել, որ քննության առաջնային նպատակը զանգվածային անկարգությունների ընթացքում տասն անձանց մահվան, ինչպես նաև անձանց մարմնական վնասվածքներ ստանալու դեպքերի բացահայտումն է։
Միաժամանակ արձանագրել, որ քրեական գործով հնարավորինս ապահովվում է թափանցիկությունը եւ ամիսը երկու անգամ քննչական խմբի ղեկավարը հանդիպում է զանգվածային լրատվության միջոցների ներկայացուցիչների հետ։ Հյուրերը դրական են գնահատել քննությանն թափանցիկությունը՝ կարեւորելով քննության արդյունքների նկատմամբ վստահության մթնոլորտի ձեւավորումը, ինչին մեծապես կնպաստի հատկապես 10 անձանց մահվան դեպքերի բացահայտումը։
