2019թ-ին Հայաստանից արտասահման ֆիզիկական անձանց դրամական փոխանցումները կազմել են 1 միլիարդ 454 միլիոն դոլար, որը 2018թ-ի համեմատ ավել է 266 միլիոն դոլարով կամ շուրջ 23 %-ով։ Ընդ որում՝ հատկանշական է, որ փողի արտահոսքն արագացել է տարվա երկրորդ կիսամյակում, մասնավորապես՝ ամենամեծ ծավալի փոխանցումները կատարվել են օգոստոս (մոտ 157 միլիոն դոլար) և դեկտեմբեր (մոտ 150 միլիոն դոլար) ամիսներին, որոնք ռեկորդային գումարներ են տրանսֆերտների վիճակագրության մեջ։
Արտահոսքի այս աճը Կենտրոնական Բանկը (ԿԲ) բացատրել է հիմնականում ավտոմեքենաների ներմուծման նույնքան զգալի աճով, այսինքն՝ ըստ ԿԲ-ի՝ գումարներն արտերկիր են փոխանցվել ավտոմեքենաների դիմաց վճարումների տեսքով։ Իսկ Պետական եկամուտների կոմիտեի տվյալների համաձայն՝ 2019թ-ի ընթացքում Հայաստան է ներմուծվել 189 հազար ավտոմեքենա։
Տնտեսագետ Աշոտ Մարկոսյանի գնահատմամբ՝ այս թիվը մտահոգության առիթ է տալիս, որովհետև Հայաստանի նման երկրի համար դա բավականին խոշոր գումար է։ Այս կապակցությամբ ԿԲ-ի պարզաբանումը Մարկոսյանն արժանահավատ է համարում, սակայն միևնույն ժամանակ չի բացառում նաև, որ գումարի արտահոսքի այլ պատճառներ ևս եղել են։
«Հայտնի փաստ է, որ մեր երկիրն ավելի շատ ներմուծում է, քան արտահանում, հետևաբար վճարման խնդիրը միշտ առկա է, ինչպես նաև գաղտնիք չէ, որ վճարումների մի մասը կարողանում ենք անել այդ տրանսֆերտների հաշվին․ սա խոսում է այն մասին, որ կառավարությունը պետք է ավելի շատ ուշադրություն դարձնի այս հանգամանքի վրա, որովհետև, Աստված չանի այս երևույթը, հանկարծ, եթե շարունակվի նաև առաջիկա տարիների ընթացքում, ապա հաջորդ քայլը լինելու է արտաքին պարտքի ավելացումը, որն ամենևին ցանկալի գործընթաց չի»,- «Առաջին լրատվական»-ի հետ զրույցում ընդգծեց տնտեսագետը։
Մանրամասները՝ տեսանյութում։
