Խորհրդարանի «Իմ քայլը» մեծամասնությունը ներկայացրել է սահմանադրության փոփոխության նախագիծը, որով էլ նախատեսվում է լուծում տալ ՍԴ թնջուկին: Լուծումը պարզ է, նույնիսկ հնարավոր է ասել՝ հանճարեղորեն պարզ:
Սահմանադրության փոփոխությամբ դադարեցվում է ՍԴ նախագահի և այն դատավորների գործունեությունը, որոնք պաշտոնավարում են 2005 թվականի Սահմանադրության կարգով: Նախկին իշխանությունը, որի տարբեր թևեր կենտրոնացած են Հրայր Թովմասյանի պաշտպանության դիրքում, արդեն իսկ սուր քննադատության է ենթարկել «Իմ քայլի» ներկայացրած տարբերակը, այն գնահատելով Սահմանադրության կոպիտ խախտում: Հատկանշական է մի բան, որ Սահմանադրության փոփոխության նախագիծը հրապարակվեց վարչապետ Նիկոլ Փաշինյանի և նախագահ Արմեն Սարգսյանի աշխատանքային հանդիպման հաջորդ օրը: Նախագծի հրապարակումից մի քանի ժամ առաջ էլ վարչապետ Նիկոլ Փաշինյանը ֆեյսբուքյան գրառումով հիշեցրեց համազգային կոնսենսուսի այն վեց կետերը, որոնց մասին հայտարարել էր օգոստոսի 5-ին՝ Ստեփանակերտի պատմական ելույթում: Նիկոլ Փաշինյանը դրանով խորհրդանշում էր Արմեն Սարգսյանի հետ հանդիպման ընթացքո՞ւմ ձեռք բերած կոնսենսուսը՝ ՍԴ հարցում:
Այստեղ, իհարկե, հետաքրքիր կարող է լինել հանգամանքը, որ խոսքը, մեծ հաշվով, արարողակարգային լիազորություն ունեցող նախագահի հետ կոնսենսուսի մասին է, որը չունի քաղաքական ֆունկցիոնալ ազդեցություն ներքին գործընթացների վրա: Մյուս կողմից, անկասկած է, որ քաղաքական էական աղմուկ կլինի, եթե հանրապետության թեկուզ արարողակարգային լիազորությամբ նախագահը իր սուր անհամաձայնությունը հայտնի այն քայլերի վերաբերյալ, որ անում է մեծամասնությունը ՍԴ խնդրի ուղղությամբ: Իսկ եթե հաշվի առնենք և այն, թե ինչպիսի միջազգային կալիբր ունի Արմեն Սարգսյանը՝ որպես գործիչ, ապա արդեն իսկ հասկանալի է դառնում, որ այդ աղմուկը կարող էր ունենալ քաղաքական էական նշանակություն՝ թեկուզ քաղաքական լծակների բացակայությամբ: Մինչդեռ, դրանից առաջ հայտնի էր «Իմ քայլի» մեկ այլ մտադրության մասին, որով նախատեսվում է Սահմանադրության փոփոխության նախագիծը չուղարկել Հանրապետության նախագահին և այն ընդունելուց հետո հրապարակել ԱԺ նախագահի միջոցով:
Եթե Նիկոլ Փաշինյանը Արմեն Սարգսյանի հետ հանդիպումից հետո ակնարկել է համազգային կոնսենսուսի մասին, դա նախագահի հետ փոխհամաձայնությա՞նն է վերաբերում, որից հետո էլ մեծամասնությունը հրապարակում է Սահմանադրության փոփոխության նախագիծն ու ՍԴ խնդրի լուծման մոտեցումը: Արմեն Սարգսյանն ավելի վաղ հայտարարել էր, որ կարևոր է ոչ միայն նպատակը, այլև լուծման միջոցները: Ինչպե՞ս է վերաբերում նախագահ Սարգսյանը լուծման այն միջոցին, որ առաջարկում է մեծամասնությունը: Կասկած չկա, որ վարչապետ Փաշինյանը նախագահի հետ աշխատանքային հանդիպմանը ներկայացրել է այն բովանդակությունը, որ հրապարակվել է հանդիպման հաջորդ օրը: Հրապարակումը կոնսենսուսի՞ նշան է, թե՞ կլինի մեծամասնություն-նախագահ հակադրություն: Մեծ հավանականությամբ, խոսքը կոնսենսուսի մասին է, առնվազն որոշակի ժամանակահատվածի համար՝ ներկայացվող լուծման շուրջ քննարկումների, որոնք, անկասկած, ներառելու են նաև արտաքին տիրույթ՝ Եվրոպայի խորհուրդը:
Ի դեպ, Արմեն Սարգսյանի դերակատարությունը հատկանշական է նաև այդ իմաստով, հաշվի առնելով նաև նրա կալիբրը: Արդյո՞ք նախագահը ստանձնելու է «Իմ քայլի» նախաձեռնության արտաքին ընկալման ռիսկերը չեզոքացնելու հանձնառություն: Վարչապետ Նիկոլ Փաշինյանը աշխատանքային այդ հանդիպումից առաջ հեռախոսազրույց էր ունեցել ԵԽ նախագահ Շառլ Միշելի հետ: Հնարավոր է, իհարկե, որ վարչապետը առնվազն միջանկյալ փոխհամաձայնության եկել է ԵԽ նախագահի հետ, որից հետո ձեռնամուխ եղել հանրապետության նախագահի հետ համաձայնության: Հարցը, թերևս, բազմավեկտոր համաձայնությունների ոչ միայն բովանդակությունն է, այլ ժամկետայնությունը:
