Կառավարությունում վերջերս քննարկվել է Հայաստանում անապահովության գնահատման և սոցիալական աջակցության նոր մոտեցման հայեցակարգը: Գաղափարական տրանսֆորմացիան, որն առաջարկում է կառավարությունը, հետևյալն է. «Մենք ուզում ենք, որ համակարգը մարդուն օգնի հաղթահարել աղքատությունը, ոչ թե մնալ աղքատության սահմաններում»:
Հիշեցնենք՝ վարչապետ Նիկոլ Փաշինյանի դիտարկմամբ՝ աղքատությունը մարդկանց գլխում է: Նրա այս հայտարարությունը տարաբնույթ մեկնաբանությունների տեղիք տվեց: Վարչապետի գնահատմամբ՝ Հայաստանում գործող անապահովության գնահատման և սոցիալական աջակցության համակարգը՝ գիտակցորեն, թե ենթագիտակցորեն, ուղղված է եղել աղքատության կոնսերվացմանը կամ պահպանմանը:
Թեմայի շուրջ «Առաջին լրատվական»-ի հետ զրույցում Աշխատանքի և սոցիալական հարցերի նախարար Զարուհի Բաթոյանը, անդրադառնալով հարցին, թե որքանով կնպաստի գաղափարական տրանսֆորմացիային անապահովության գնահատման և սոցիալական աջակցության նոր մոտեցման հայեցակարգը, նշեց. «Նոր հայեցակարգի նպատակն է խրախուսել աշխատանքը և հասկանալ, թե քաղաքացին և ընտանիքը որքան եկամուտ պետք է ունենան, որպեսզի ապահովեն իրենց նվազագույն եկամուտը: Այս պահին քաղաքացուն կամ ընտանքին աջակցությունը տրամադրվում է ոչ այդ տրամաբանությամբ:
Կարևոր է աշխատունակության գործոնը, եթե մարդն աշխատունակ է, պակասում է սոցիալական նպաստի համակարգում ընդգրկվելու հավանականությունը: Կարևոր է նաև երեխաների գործոնը, որը հակառակը՝ ավելացնում է համակարգում ընդգրկվելու հավանականությունը:
Եվ, իհարկե, կարևոր են աջակցության ձևերը, աջակցությունը պետք է լինի ոչ միայն ֆինանսական, այլ նաև ոչ ֆինանսական, որն ուղղված կլինի աղքատության հաղթահարմանը՝ կարողությունների զարգացման, բնակարանային ապահովման, առողջապահական, կրթական ծրագրեր և այլն»:
Նախարարի խոսքով՝ ապրիլից կմեկնարկի պայմանական նպաստի համակարգը, ինչը ենթադրում է խրախուսում աշխատանքի, կարողությունների զարգացման, վերաորակավորման և այլն:
Զարուհի Բաթոյանի խոսքով՝ սոցիալական աջակցության ծրագիրը կբարեփոխվի. «Այս ծրագրով Ֆինանսական աջակցությունը տրամադրվելու է բացառապես այն ընտանիքներին, որտեղ պարենային զամբյուղի ապահովման խնդիր կա, և որտեղ չկա կամ քիչ է աշխատունակ անձանց գործոնը»:
Մանրամասն՝ տեսանյութում:
