Զբոսաշրջային սեզոնի հետ կապված այժմ մեծ աշխուժություն է նկատվում վարձակալության տրվող բնակարանների գործարքներում: «Առաջին լրատվական»-ի հետ զրույցում անշարժ գույքի շուկայի մասնագետ Դավիթ Հովհաննիսյանը նշեց, որ զբոսաշրջային այս ակտիվ փուլում բնակարանները հիմնականում տրվում են օրավարձով, հատկապես մայրաքաղաքի կենտրոնական հատվածներում:
Ներկայում 1 բնակարանի օրավարձը տատանվում է Կենտրոնում միջինում 50-100 դոլարի սահմաններում, իսկ ծայրամասերում՝ 30-50 դոլարի սահմաններում: Ձմռանն օրավարձով տրվող բնակարանները եզակի են, և հիմնականում վարձով տրվում են ամսական կտրվածքով:
«Եթե օրավարձով հաշվելիս 3000 դոլար է ամսական ստացվում, ապա ձմռանը արդեն ամսական վարձը մոտ 1000 դոլար է լինում, բայց համեմատություն անցկացնելը տեղին չէ»,- ասաց Դ.Հովհաննիսյանը՝ հավելելով, որ այս սեզոնին գները բարձրանում են, հետո կրկին նվազում:
Ի դեպ, զբոսաշրջիկների մի մասը, հատկապես իրանցիները, նախընտրում են բնակարան վարձակալել, քան իջևանել հյուրանոցում:
