Իրանի արտաքին գործերի նախարար Մոհամադ Ջավադ Զարիֆը չի բացառել ամերիկյան կողմի հետ բանակցությունների հնարավորությունը ԱՄՆ-ի գործողությունների արդյունքում «Իսլամական հեղափոխության պահապանների կորպուսի» (IRGC, Իրանի զինված ուժերի էլիտար ստորաբաժանումներ) Ալ-Քուդս հատուկ նշանակության ջոկատի հրամանատար Ղասեմ Սոլեյմանիի մահից հետո՝ գրում է TASS-ը:
«Ես երբեք չեմ բացառում հնարավորությունը, որ մարդիկ փոխեն իրենց մոտեցումը և ընդունեն իրական իրավիճակը:
Մեզ համար կարևոր չէ, թե ով է նստած Սպիտակ տանը: Մեզ համար կարևոր է նրանց վարվելակերպը: Թրամփի վարչակազմը կարող է շտկել անցյալը, վերացնել պատժամիջոցները և վերադառնալ բանակցությունների սեղանին: Մենք դեռ բանակցությունների սեղանի շուրջ ենք: Այդ նրանք են հեռացել»,- ասել է Զարիֆը ուրբաթ օրը Der Spiegel- ին տված հարցազրույցում:
Մեկնաբանելով իրանական միջուկային ծրագրի վերաբերյալ Համատեղ գործողությունների համապարփակ ծրագրի ապագան՝ Զարիֆը նշել է, որ այդ պայմանագիրը մեռած չէ, չնայած ԵՄ երկրները, ըստ նրա, չեն կատարել գործարքի պայմանների մի մասը: Ինչպես պարզաբանել է արտգործնախարարը, եվրոպական երկրները, օրինակ, երբեք չեն օգտագործել Իրանի հետ ֆինանսական կարգավորման համար ստեղծված INSTEX մեխանիզմը՝ շրջանցելով ամերիկյան պատժամիջոցները: «Ստուգումները և թափանցիկությունը Իրանի գործողություններում գործարքի կարևոր մասն են, և այն դեռևս գործում է: ԵՄ-ն չի կատարել գործարքի մի մասը, և Իրանը չի կատարել մ մասը, բայց դա չի նշանակում, որ այն մեռած է», – հավելել է նախարարը:
