Եթե Բաղդադի հայ համայնքին կոչ անելու որոշում կայացվի, ԱԳՆ-ն հանդես կգա հայտարարությամբ։ Այս պահի դրությամբ նման բան չկա։ «Փաստինֆո»-ի հարցին ի պատասխան ասաց ԱԳՆ մամուլի խոսնակ Աննա Նաղդալյանը։
Հիշեցնենք, որ հունվարի 2-ի լույս 3-ի գիշերը Բաղդադի միջազգային օդանավակայանի դիմաց ամերիկյան հատուկ գործողության՝ հրթիռակոծման հետևանքով սպանվեց «Իսլամական հեղափոխության պահապանների կորպուսի» «Ղոդս» ստորաբաժանման ղեկավար, գեներալ Ղասեմ Սոլեյմանին: Պենտագոնը հայտարարեց, որ հարվածը Բաղդադի օդանավակայանի ուղղությամբ իրականացվել է ԱՄՆ նախագահ Դոնալդ Թրամփի հանձնարարությամբ: Իրանի գերագույն հոգևոր առաջնորդ, Այաթոլա Ալի Խամենեին հայտարարեց, որ Սոլեյմանիին սպանողներին դաժան վրեժ է սպասվում:
Աննա Նաղդալյանն ասաց, որ Բաղդադում ՀՀ դեսպանությունն աշխատում է իր բնականոն ռեժիմով և մշտապես կապի մեջ է տեղի հայկական կառույցների, հայ համայնքի հետ։
Նշենք, որ նախօրեին հարձակում էր տեղի ունեցել նաև Քենիայում ԱՄՆ ՌԾՈՒ բազայի վրա, որի հետևանքով սպանվել էր ԱՄՆ ռազմական ծառայության մեկ աշխատակից և պայմանագրային երկու զինծառայող։
Աննա Նաղդալյանը նաև հայտնեց, որ ՀՀ-ն Քենիայում ներկայացուցչություն չունի։ Այնտեղ չկա նաև հայկական համայնք. «ՀՀ քաղաքացիներ կարող են մեկ-երկու հոգի լինել։ Մոտակա հյուպատոսարանում հաշվառման կանգնած և Քենիայում մշտական բնակություն ունեցող ՀՀ քաղաքացիների տվյալներ մենք չունենք»,-ասաց Աննա Նաղդալյանը։
Հավելենք, որ որոշ պետություններ նշված շրջաններում բնակվող իրենց քաղաքացիներին զգույշ և զգոն լինելու կոչեր են արել։ Այդ պետությունների թվում է նաև ԱՄՆ-ն, Ռուսաստանը։
