Լոռու մարզի ընդհանուր իրավասության դատարանում Աղասի Մկոյանի նախագահությամբ ավարտվել է Արտավազդ Աղաջանյանի գործի դատական քննությունը:
Ըստ դատական ակտի՝ 34-ամյա տաշիրցի Արտավազդ Աղաջանյանը 2011 թվականի հունիսի 1-ին ամուսնացել է ՌԴ քաղաքացի Տատյանա Իվանովայի հետ և բնակություն է հաստատել ՌԴ Սարատով քաղաքում:
2012 թվականի օգոստոսի կեսերին Արտավազդի և Տատյանայի միջև ընտանեկան անհաշտություն է ծագել, պարբերաբար վիճաբանություններ են տեղի ունեցել: Տատյանան Արտավազդից պահանջել է հեռանալ իրենից, հեռանալ Սարատովից ու վերադառնալ Հայաստան:
Օգոստոսի 15-ին Արտավազդը տանն է եղել:
Ժամը 17-ն անց 30-ի սահմաններում Տատյանան աշխատանքից վերադարձել է տուն, կրկին վիճաբանել ամուսնու հետ:
Վիճաբանությունը սկսվել է խոհանոցում, շարունակվել հյուրասենյակում:
Վիճաբանության ընթացքում Արտավազդը գործով չպարզված դանակով դիտավորությամբ հարվածել է Տատյանայի կրծքավանդակի աջ մասին, պատճառել կյանքի համար վտանգավոր ծանր վնաս՝ թափանցող, ծակած-կտրած վնասվածք:
Այնուհետև Արտավազդ Աղաջանյանը վերադարձել է Հայաստան:
Դեպքի առթիվ ՌԴ Սարատով քաղաքի ոստիկանությունը հարուցել է քրեական գործ: Արտավազդ Աղաջանյանը ներգրավվել է որպես մեղադրյալ:
2013 թվականի ապրիլի 10-ին Աղաջանյանի նկատմամբ քրեական հետապնդումը շարունակելու նպատակով քրեական գործը ՀՀ գլխավոր դատախազության միջոցով ուղարկվել է Լոռու մարզի քննչական բաժնի Տաշիրի քննչական խումբ:
Դեկտեմբերի 17-ին քննիչի որոշմամբ Արտավազդ Աղաջանյանի արարքը համապատասխանեցվել է ՀՀ քրեական օրենսգրքի 112 հոդվածի 1-ին մասին՝ դիտավորությամբ տուժողի առողջությանը ծանր վնաս պատճառելը:
Դեկտեմբերի 20-ին Արտավազդ Աղաջանյանին մեղադրանք է առաջադրվել 112 հոդվածի 1-ին մասով:
Աղաջանյանը հրաժարվել է առաջադրված մեղադրանքի վերաբերյալ դիրքորոշում հայտնելուց:
Նա նշել է, որ ընտանեկան վիճաբանությունների ժամանակ կինը՝ Տատյանան ասում էր, թե այլևս չի ցանկանում իր հետ ապրել, պահանջել է, որ ինքը Հայաստան վերադառնա:
Արտավազդն ասել է, թե դեպքի օրվա ընտանեկան վիճաբանության ընթացքում կատարվածը չի հիշում: Մտաբերում է միայն, որ հայտնվել է ինչ-որ դեղատանը, դեղեր է գնել, հիշում է, որ ավտոբուսում է եղել, որով վերադարձել է Հայաստան:
Ըստ Արտավազդի՝ իր և Տատյանայի ամուսնալուծության պատճառով ունեցած հոգեկան ապրումների հետևանքով է, որ չի կարողանում մտաբերել դեպքի հանգամանքները:
Ընդհանուր իրավասության դատարանում ամբաստանյալ Արտավազդ Աղաջանյանն իրեն լիովին մեղավոր է ճանաչել, զղջացել է:
Դատարանում հրապարակվել են տուժող Տատյանա Իվանովայի ցուցմունքները:
Տատյանան ասել է, թե դեպքի օրը վիճաբանել է ամուսնու հետ, վիճելով գնացել է հյուրասենյակ՝ շորերը փոխելու: Իր հետևից սենյակ է մտել ամուսինը, հարվածել իր կրծքավանդակին: Ինքն ամուսնու ձեռքի դանակը տեսել ու հասկացել է, որ նա դանակով է խփել իրեն: Խնդրել է, որ անմիջապես զանգի իր ծնողներին կամ շտապօգնություն:
Հարվածելուց հետո Արտավազդը սկսել է իրենից ներողություն խնդրել: Նա որևէ մեկին չի զանգահարել, այլ դանակը ձեռքին տնից դուրս է եկել՝ ասելով, թե գնում է դեղ գնելու:
Ամուսնու հեռանալուց հետո ինքը վերելակով իջել է բակ, մի անծանոթ տղամարդուց հեռախոս է խնդրել ու զանգահարել է քրոջը: Հայտնել է կատարվածի մասին: Ապա ուժասպառ նստել է բակում գտնվող տաղավարում:
Որոշ ժամանակ անց մոտեցել է Արտավազդը, ձեռքին՝ դեղեր: Ինքն ասել է, որ արդեն զանգել է իր հարազատներին, պատմել է կատարվածը:
Արտավազդը դեղերը մի կողմ է շպրտել ու հեռացել է:
Եկել է իր քույրը, հետո շտապօգնության մեքենայով իրեն տեղափոխել են հիվանդանոց:
Տուժողը Արտավազդին քաղհայցի պահանջ չի ներկայացրել:
Ընդհանուր իրավասության դատարանը Արտավազդ Աղաջանյանին մեղավոր է ճանաչել ՀՀ քրեական օրենսգրքի 112 հոդվածի 1-ին մասով և դատապարտել է 3 տարի ազատազրկման:
Կիրառվել է համաներման ակտը, և Արտավազդ Աղաջանյանն ազատվել է պատժի կրումից:
