Աֆղանստանի վերակառուցման նախագծերում ներգրավված ամերիկացի և միջազգային խոշոր կապալառուներին մեղադրում են սեփական անվտանգությունն ապահովելու համար «Թալիբան» արմատական շարժմանը վճարելու մեջ, մինչդեռ փոխանցված գումարները հետագայում կարող են օգտագործվել ԱՄՆ զորքերի դեմ, գրում է Wall Street Journal թերթը:
Ըստ թերթի, ուրբաթ օրը ԱՄՆ դաշնային դատարանում նման մեղադրանքով հայց է ներկայացվել: Հայցվորները 2009-2017 թվականներին Աֆղանստանում զոհված կամ վիրավորված ԱՄՆ 143 զինվորականի և վարձկանների ընտանիքներն են:
Նրանք պնդում են, որ ընկերությունները բազմիցս շարժմանը վճարել են տեղի ենթակապալառուների միջոցով, որոնք կա՛մ գումարը փոխանցել են թալիբներին, կա՛մ նրանց աշխատանքի են վերցրել: Ըստ դատական գործի, այդ փոխանցումները ընկերություններին թույլ են տվել խնայել իրենց ռեսուրսներն ու անձնակազմի անվտանգությունը, «չնայած այդ գումարներով գրոհայինները հարձակվել են ԱՄՆ զորքերի և իրենց չվճարած այլ կազմակերպությունների վրա»:
Հայցադիմումում նշված ընկերությունների ցանկում են Միացյալ Նահանգների միջազգային զարգացման գործակալության (USAID) ԱՄՆ խոշորագույն կապալառուներից երկուսը՝ DAI Global ՍՊԸ-ն և Louis Berger Group-ը։ Նրանք հաշվետվության մեջ ներկայացրել են, որ 2007-2009 թվականներին մոտ մեկ միլիարդ դոլար են հատկացրել երկրի զարգացմանը աջակցելու նպատակով:
Հայցադիմումում նշված ընկերությունները հրաժարվեցին մեկնաբանել մեղադրանքները:
