«Հրապարակ»-ը գրում է. Կադրային նշանակումներն ու քննարկումները շարունակվում են: Ընդ որում, շատ դեպքերում, առավոտյան մի որոշում է կայացվում, երեկոյան’ մեկ այլ. փոխնախարար Պավլիկ Սաֆարյանին ֆինանսների նախարար դարձնելու որոշումը մի քանի անգամ տրանսֆորմացիայի է ենթարկվել: Ինչ վերաբերում է Հյուսիսային պողոտան քարե արձանի վերածած Նարեկ Սարգսյանին, ապա երեկոյան արդեն հրապարակվեց նրան քաղաքաշինության նախարար նշանակելու որոշումը:
Թերթի տեղեկություններով, նրա տակ են «պատրաստվում» բերել նաև հուշարձանների պահպանության և մի շարք այլ «յուղոտ թիքաներ», որպեսզի նարեկյան ստեղծագործ միտքն արձաններ կառուցելու գործում պարապուրդի չմատնվի: Նախկին քաղշինը, ըստ ամենայնի, կձևափոխվի՝ կվերածվի կոմիտեի կամ այլ մարմնի՝ Սամվել Թադևոսյանի գլխավորությամբ:
Գյուղնախարար Սերգո Կարապետյանը ևս կպահպանի իր պորտֆելը. նա հիմա Փարիզում է’ աշխատանքային գործուղման, կվերադառնա, և Սերժ Սարգսյանը կասի իր տղամարդկային խոսքը: Մեր տեղեկություններով, բնապահպանության նախարարի հարցը ևս գրեթե լուծված է. Արարատի մարզպետ Արամայիս Գրիգորյանն է պատրաստվում ստանձնել այդ պորտֆելը: Ո՞վ կդառնա Արարատում մարզպետ, այս պահին հայտնի չէ, սակայն շրջանառվում են Հովիկ Աբրահամյանի մերձավորների՝ «մոքիրի թոռ» Կարինե Պողոսյանի, Ջրային տնտեսության կոմիտեի նախագահի տեղակալ Ռուբիկ Աբրահամյանի անունները:
Մանրամասները՝ թերթի այսօրվա համարում:
Լուսանկարը` PanARMENIAN Photo-ի
