Հռոմի պապ Ֆրանցիսկոսը կարող է անսպասելիորեն այցելել ռազմական գործողությունների շրջաններ, եթե վստահ լինի, որ իր ներկայությունը կկարողանա օգնել խաղաղություն հաստատել՝ կարծում է Վատիկանի պետքարտուղար, կարդինալ Պիետրո Պարոլինը: Այս տեսակետը նա բերում է իր՝ «Աշխարհի պապերը» նոր գրքում, որը ներկայացրել է ANSA գործակալությունը:
Կարդինալը նշում է, որ պապ Ֆրանցիսկոսը պատրաստ է օգնել «իր ներկայությամբ, նույնիսկ հանպատրաստից ընտրած միջոցներով» և հակամարտության օջախներում խաղաղություն հաստատել: Թե հատկապես ինչ խնդրահարույց տարածքներ նկատի ունի՝ Պարոլինը չի ճշգրտել:
Պարոլինը նշել է, որ Ֆրանցիսկոս պապը հաճախ է զարմացնում աշխարհին, ինչը «նա ցույց տվեց առաջին անգամ Սուրբ Պետրոսի մայր տաճարի պատշգամբում 2013-ի մարտի 13-ին երևալով»:
Բացի դրանից, կարդինալի խոսքով՝ պապը շատ ջանք է գործադրում ամբողջ աշխարհում խաղաղությունը պահպանելու համար, օրինակ՝ 2013-ի սեպտեմբերի 7-ին Սիրիայում աղոթքի միջազգային օրը պապի խաղաղության կոչը:
Աշխարհի պապերը» գիրքը ներկայացվել է ապրիլի 17-ին, հայտնում է «Սեդմիցա.ռու» պորտալը:
