Իսրայելցիներին և պաղեստինցիներին ոչ մի կերպ չի հաջողվում պայմանավորվել վաղեմի տարածքային վեճը լուծելու համար խաղաղ բանակցությունները շարունակելու հարցում, հայտնում է NEWSru Israel-ը:
Նախօրեին Պաղեստինի իշխանությունները մի շարք նախապայմաններ էին առաջ քաշել բանակցային գործընթացը շարունակելու համար, բայց Իսրայելի կառավարությունը նույնիսկ չի քննարկել պաղեստինցիների հայտարարությունները:
Պաղեստինի ղեկավար Մահմուդ Աբասը իսրայելական մի քանի պարբերականներին տված հարցազրույցում ասել է, որ Երուսաղեմը պետք է մի քանի պայման կատարի, որպեսզի խաղաղ բանակցությունները, որոնց ժամկետն ավարտվում է ապրիլի 29-ին, ևս 9 ամսով երկարաձգվեն:
Իսրայելցիները, Աբասի խոսքով, պետք է, առանց Իսրայելի և Պաղեստինյան Ինքնավարության սահմաններից դուրս արտաքսման, ազատեն արաբ 26 բանտարկյալներին, դադարեցնեն Հորդանան գետի արևմտյան ափին բնակավայրերի կառուցումը և ապագա խաղաղ բաբնակցությունները սկսեն երկու պետությունների սահմանների մասին հարցով:
Առաջ քաշված պայմանների կատարումից հրաժարվելը, ինչպես նշել է Աբասը, կհանգեցնի Պաղեստինի ազգային վարչության լուծարմանը: Պաղեստինցի քաղաքական գործչի խոսքով՝ այդ մարմինը ստեղծվել է որպես ժամանակավոր միջոցառում անկախ պետություն ստեղծելու ճանապարհին: Եթե Պաղեստինի ազգային վարչությունը չի բերում նախատեսված նպատակին, դրա գոյությունն անիմաստ է, նշել է Աբասը:
Իսրայելցի լրագրողների հետ շփվելու վստահություն Աբասին տվել է ՖԱԹՀ և ՀԱՄԱՍ խմբավորումների համագործակցելու շորջ պայմանավորվածությունը, որոնք պայմանավորվել են ընդհանուր կառավարություն ստեղծել:
Իսրայելը, սակայն, մերժել է առաջադրված բոլոր պայմանները: The Jerusalem Post թերթի՝ Իսրայելի վարչապետ Բենյամին Նեթանյահուի շրջապատից աղբյուրները հայտնել են, որ խաղաղ բանակցությունները շարունակելու համար որևէ պայման ներկայացնելը պարզապես անընդունելի է: Նեթանյահուի շրջապատից աղբյուրները նշել են, որ Աբասի խոսքերը վկայում են, որ նա հետաքրքրված չէ խաղաղությամբ:
Իսրայելի և Պաղեստինի միջև խաղաղ բանակցությունները սկսվել են 2013-ի ամռանը: Այդ բանակցությունների ժամանակ, ինչպես ենթադրվում էր, պետք է լուծվեր Արևելյան Երուսաղեմի շուրջ վեճը:
