ՀՀ կրթության, գիտության, մշակույթի և սպորտի նախարարությունը 2019 թվականին Հայաստանի մարզերում, Երևանում և Արցախի Հանրապետությունում անց է կացրել 12 մարզական մասսայական միջոցառում՝ 225489 քաղաքացու մասնակցությամբ:
Գերատեսչության նախաձեռնությամբ անցկացված մարզական փառատոնին մասնակցել է 43 քաղաքային, 5 գյուղական համայնք և Ստեփանակերտը, կազմակերպվել են առանձին գյուղական մարզական խաղեր:
Դեկտեմբերի 19-ին անցկացված մրցանակաբաշխության ընթացքում ողջունելով ներկաներին՝ ՀՀ ԿԳՄՍ նախարար Արայիկ Հարությունյանը կարևորեց նմանատիպ միջոցառումների անցկացումը:
«Սպորտի մասսայականացումը և ֆիզիկական կուլտուրայի ոլորտը մեզ համար եղել և մնում է սոցիալական քաղաքականության առաջնահերթություններից մեկը: Կարծում եմ, որ այդ քաղաքականությունը պետք է լինի մանկապարտեզից մինչև պրոֆեսիոնալ սպորտ: Ոլորտում մենք դեռ անելիքներ ունենք և դրանք պետք է իրականացնենք միասին»,- նշեց Հարությունյանը:
Նա շնորհավորեց բոլոր այն մարզիկներին ու մարզիչներին, ովքեր 2019 թվականին փայլել են տարբեր միջազգային մրցաշարերում և առաջնություններում:
Իրականացվել են նաև ՀՀ պետական մարմինների միջև հրաձգության, «Երեխաների խնամքի և պաշտպանության լավագույն հաստատություն», «Լավագույն մարզական նախադպրոցական հաստատություն» մրցույթները:
Մրցանակային տեղեր գրաված համայնքները պարգևատրվեցին ԿԳՄՍ նախարարության հավաստագրերով, գավաթներով և մարզագույք ձեռք բերելու համար դրամական պարգևներով՝ 1-ին տեղ՝ 450 հազար դրամ, 2-րդ տեղ՝ 350 հազար դրամ և 3-րդ տեղ՝ 250 հազար դրամ:
571 ընտանիք, որից 21 ընտանիքի հայրը կամ մայրն ունեցել է հաշմանդամություն, պայքարել է «Լավագույն մարզական ընտանիք» մրցույթի կոչման համար: Շուրջ 1600 տարեց, հուլիս-օգոստոսին և սեպտեմբեր-հոկտեմբերին Ծաղկաձորի գլխավոր մարզահամալիրում մասնակցել է «Տարեցների հանրապետական մարզական խաղեր» մրցույթին:
«Հաշմանդամություն ունեցող լավագույն մարզիկ» մրցույթում լսողական, տեսողական, հենաշարժողական և մտավոր խնդիրներ ունեցող շուրջ 300 անձ պայքարել է բասկետբոլ, սեղանի թենիս, շախմատ, բազկամարտ, շաշկի, դարթս, եռամարտ մտավոր խնդիրներ ունեցող անձանց համար և եռամարտ լսողական խնդիրներ ունեցող անձանց մարզաձևերում:
Շուրջ 5000 ուսանող մասնակցել է հանրապետական ուսանողական մարզական խաղերին, իսկ հանրակրթական դպրոցների 1-7-րդ դասարանների աշակերտները՝ «Սպորտլանդիա» մարզական միջոցառմանը, 8-12-րդ դասարանցիները՝ «Սպարտակիադայի» և նախազորակոչային ու զորակոչային տարիքի երիտասարդության հանրապետական ռազմամարզական խաղերին:
ԿԳՄՍ նախարարությունը մասսայական սպորտի և ֆիզիկական դաստիարակության քաղաքականության վարչությունն ուսումնասիրել ու գնահատել է անցնող տարում անցկացված միջոցառումներին մարզերի մասնակցությունը և լավագույն արդյունք գրանցած Շիրակի մարզը պարգևատրվում է գավաթով:
