Երևանի քաղաքապետարանի «Լույս» խմբակցության շուրջ ստեղծված իրավիճակը, որ սրվեց խմբակցության իր անդամին հետ կանչելու «Լուսավոր Հայաստան» կուսակցության հայտնի որոշումով, բավականին հետաքրքիր իրավիճակ է ստեղծել ներքաղաքական դաշտում: Նախկին իշխող համակարգը բավականին ինտենսիվ կերպով ձեռնամուխ է եղել Դավիթ Խաժակյանին «Լուսավոր Հայաստանի» ղեկավարությունից պաշտպանելու գործին: Այդ հանգամանքը իր հերթին կարող է ավելացնել «Լուսավոր Հայաստանի» միավորները հանրային վարկի իմաստով, որոնք լրջորեն նվազել էին հետհեղափոխական քաղաքական զարգացումների մի շարք հանգուցային փուլերում քաղաքական այդ ուժի ոչ համարժեք դիրքորոշումների պատճառով:
Այդ իրավիճակն իր հերթին մրցակցային է դառնում խորհրդարանում ու Երևանի ավագանում երկրորդ, այսպես ասած, ընդդիմադիր ուժի՝ ԲՀԿ համար: Բանն այն է, որ «Լուսավոր Հայաստանի» միավորները աճելու են ո՛չ «Իմ քայլի» և ո՛չ էլ նախկին իշխանության որևէ ուժի, այլ գերազանցապես ԲՀԿ նկատմամբ: Ըստ ամենայնի, «Բարգավաճ Հայաստանն» առաջիկայում կփորձի որևէ գործողություն կամ քայլ իրադարձությունների հետևից հասցնելու համար, ինչպես քաղաքապետարանի շուրջ մինչ այդ եղած ԿամԱԶ-ների պատմության առումով, որում «Լուսավորի» առաջատարությունը «Բարգավաճ Հայաստանը» փորձեց վիճարկել «շեյխերի» խաղաքարտով, թեև ստացավ առավելապես բումերանգի էֆեկտ կամ հարված:
Մեծ հաշվով, Խաժակյանի թեման օգտագործելով իշխանության և «Լուսավոր Հայաստանի» վրա ուժեղ ճնշման նպատակով, նախկին իշխող համակարգը իրականում, կամա թե ակամա, ավելի մեծացնում է ճնշումը ԲՀԿ շուրջ, միաժամանակ էապես նեղացնելով ԲՀԿ մանևրի հնարավորությունը:
Նախկին համակարգի և ԲՀԿ հարաբերության իմաստով այդ խնդիրը ունի էքզիստենցիալ բնույթ և լինելու է այդպիսին, քանի դեռ ԲՀԿ-ն կամ արմատապես և լիովին չի հրաժարվել իր անցյալից՝ հիմնարար և համընդգրկուն կերպով, կամ չի հրաժարվել իր ներկայից ու ապագայից և չի վերադարձել այն համակարգ, որտեղից սերվել է: Մեծ հաշվով, չնայած բովանդակային ապակառուցողականությունը, զուտ քաղաքական օրգանիզմի ֆիզիոլոգիայի տեսանկյունից ներկայիս ընթացքը հայաստանյան իրողությունների համար առողջացնող է, առերեսող, քաղաքական ֆիլտրացիայի մեծ նախադրյալներով: Ի վերջո, բոլորը պետք է առերեսվեն միմյանց և նոր իրողությունների հետ՝ կողմնորոշվելով, թե ում և որտեղ են մերժում կամ խժռում:
