ՀՀ վերաքննիչ քրեական դատարանում դատավոր Լուսինե Աբգարյանի նախագահությամբ դեկտեմբերի 16-ին մեկնարկեց Երևանի ընդհանուր իրավասության դատարանի կողմից ՀՀ երկրորդ նախագահ Ռոբերտ Քոչարյանի խափանման միջոցի հարցով դատական նիստը: Այս դատական նիստին ներկա չէ Ռոբերտ Քոչարյանը, քանի որ նա գտնվում է բժշկական կենտրոնում։
Դատավոր Լուսինե Աբգարյանը կողմերից հետաքրքրվեց, թե արդյոք ունեն դատավորին ինքնաբացարկ հայտնելու միջնորդություն:
Քոչարյանի պաշտպան Հայկ Ալումյանն ասաց, որ նախքան իրենց դիրքորոշումը արտահայտելը, իրենց անհրաժեշտ է, որպեսզի դատավոր Աբգարյանը բացահայտի մի քանի հանգամանք նրա կապերին առնչվող:
«Լինելու է մի հարց, և, կարծում եմ, դռնփակ նիստում պետք է տրվի այդ պատասխանը: Հետևաբար, միջնորդում եմ, որպեսզի քննարկման այս հատվածը դռնփակ անցկացվի»,- ասաց Ալումյանը:
Մեղադրող կողմը չառարկեց միջնորդությանը: Դատարանը որոշում կայացրեց նիստը դռնփակ անցկացնել: Լրագրողները հեռացան դատական նիստերի դահլիճից:
