Փարիզի Կանադա հրապարակում` Կոմիտասի արձանի առջև, ապրիլի 24-ի` Հայոց ցեղասպանության 99-րդ տարելիցին նվիրված պաշտոնական արարողությանը կմասնակցի Ֆրանսիայի նախագահ Ֆրանսուա Օլանդը: Քաղաքագետ, Ֆրանսիայի ռազմավարական hետազոտությունների կենտրոնի փորձագետ Կայծ Մինասյանն «Առաջին լրատվական»-ի հետ զրույցում նշեց, որ առաջին անգամ է Ֆրանսիայի Հանրապետության նախագահն իր ղեկավարման շրջանում ներկա գտնվում նման միջվոցառման:
«Վերջին անգամ ընտրապայքարի մեջ էինք, նախկին նախագահ Նիկոլա Սարկոզին եկավ, ինչը նույնպես շատ կարևոր էր, սակայն այդ ժամանակ Նիկոլա Սարկոզին ընտրապայքարում էր: Երկու տարի առաջ Հայոց ցեղասպանության տարելիցի օրը նախագահական ընտրությունների երկու փուլերի միջակայքում էր, այսինքն` ապրիլի 24-ը նախագահական առաջին փուլից հետո էր և երկրորդից առաջ, ուրեմն կարելի է ասել` այդ ժամանակ, այդ պահին ընտրապայքարի մթնոլորտ կար, բայց այսօր` երկու տարի անց, նախագահական ընտրապայքար չկա»,- ասաց նա` հավելելով, որ թեպետ եվրոպական խորհրդարանի ընտրություններ կան, բայց դրանք փոքր-ինչ ավելի ուշ են:
Մինասյանը կարծում է, որ դա առավելապես կապված է Կովկաս այցելության հետ, թեպետ Քեսաբի հետ էլ կարող է կապ ունենալ, սակայն առավելապես տարածաշրջան այցելությունն է նախագահի այդ որոշման հիմքում: Մինասյանը շատ հավանական է համարում, որ ապրիլի 24-ից հետո մինչև մայիսին Երևան այցելությունը շատ բաներ կարող են պատահել: Նա հավանական համարեց նաև այն, որ Ցեղասպանության ժխտումը քրեականացնող նոր օրինագիծ կմշակվի:
«Իր խոստումը հարգելով է, և հավանական է, որ բան պիտի հայտարարի Ցեղասպանության նախագծի վերաբերյալ: Դեռ պիտի հայտարարի, որ դեռևս այդ նախագիծը պիտի ներկայացվի նախարարների խորհրդին: Ես իրապաշտ եմ, բայց լավատես: Փակենք այս խնդիրը Ֆրանսիայում, ուրիշ հարցով զբաղվենք` Ղարաբաղի խնդրով, այլ հարցերով»,- ասաց Կայծ Մինասյանը:
