Ընդդիմադիր «Բարև Երևան» ավագանու անդամները բազմիցս դժգոհել են ավագանիում ներկայացված «Բարգավաճ Հայաստան»-ի խմբակցությունից՝ մասնավորապես հայտարարելով, որ նրանք համագործակցում են ոչ թե իրենց՝ ընդդիմադիրների հետ, այլ աջակցում են մեծամասնությանը՝ ՀՀԿ ավագանուն:
«Առաջին լրատվական»-ի հետ զրույցում «Բարև Երևան» ավագանու անդամ Արթուր Գասպարյանն ասաց, որ այդ մթնոլորտն ավագանիում չի վերացել, և նրանց համար մինչ այժմ հստակ չէ ԲՀԿ-ի կեցվածքը․ «Երբ մեր օգնությունն իրենց պետք է լինում՝ դիմում են, մենք աջակցում ենք ամեն հարցում, բայց երբ մենք ենք դիմում, իրենք աջակցում են այնքան ժամանակ, մինչև դա չի վնասում ՀՀԿ-ի շահերին: Հենց նրանք նկատում են կամ գուցե իրենց տեղեկացնում են, որ դա վնասում է իրենց սկզբունքին, կամ իրենց քաղաքականությանը, միանգամից կտրում են այդ համագործակցության թելը»,- ասաց Գասպարյանը՝ ընդգծելով, որ ԲՀԿ-ն ավագանում «ни рыба, ни мясо»:
Նա ավելացրեց, որ իրենք անընդհատ փորձում են համագործակցել և հատուկ շեշտեց, որ լավ աշխատանքի համար իրենց անհրաժեշտ է ԲՀԿ աջակցությունը՝ գոնե քանակական առումով․ «Իհարկե մեզ իրենց օգնությունն էլ է պետք, նրանք ավագանիների քանակություն ունեն, ի վերջո ինչ-որ չափի կարող են ազդել քվեարկության վրա, բայց բացի քանակությունը՝ ինչ-որ ձևով չեմ կարող բնութագրել ԲՀԿ խմբակցությունը: Ես այլ կերպ, քան քանակություն՝ չեմ կարող բնութագրել»:
Բացի այդ՝ Արթուր Գասպարյանն ասաց, որ ԲՀԿ-ն ունի 17 ավագանի, բայց գործունեությունը իրականացնում է միայն իրենց խմբացկության ղեկավարը՝ տիկին Թամարա Պողոսյանը․ «Քվեարկությունն իրականացվում է այնպես, ինչպես իրենց խմբակցության ղեկավարը կասի, ոչ մեկ ոչ կարող է կարծիք հայտնել, ոչ էլ ուզում են հայտնել, եթե կարծիք ունենան էլ, չեն հայտնի: Տոտալիտարիզմի հոտ է գալիս ԲՀԿ-ից»:
Մեր զրուցակիցը հայտնեց նաև, որ շուտով Երևանի ավագանու նիստում կքննարկվի նաև տրանսպորտի ուղեվարձի հարցը, և հույս հայտնեց, որ այդ հարցում գոնե ԲՀԿ-ն իրենց կաջակցի․ «Օրենքով այդ որոշումը՝ տրանսպորտի ուղեվարձի հետ կապված՝ պետք է քաղաքապետը որոշեր: Բայց Ազգային ժողովի այդ օրենքում փոփոխություն կատարվեց և որոշվեց, որ գնագոյացումը կամ գնի հաստատումը պետք է ավագանիում քննարկվի, հաստատվի: Այդ օրենքը նոր-նոր մտել է ուժի մեջ, և, կարծում եմ, այս ուղեվարձի հարցը առաջիկայում ավագանու նիստին կներակայացվի: Դրանից առաջ ավագանին դրա իրավունքը չուներ:
Ամեն դեպքում հույսս չեմ կորցնում, հուսով եմ մեզ կաջակցեն ԲՀԿ-ի մեր գործընկերները, որովհետև այս խնդիրն արդեն զանգվածային բնույթ կրող խնդիր է, լոկալ խնդիրներ չեն, ասենք թե՝ այս հողը ծախեցինք կամ դեմ ենք այն ավտոտնակի կառուցմանը, սա զանգվածային բնույթ կրող խնդիր է: Հույս ունեմ, որ գոնե կաջակցեն այս հարցում մեզ»,- ասաց նա:
Նա հավելեց, որ անձնական թնշամություն կամ վատ հարաբերություններ չունի ավագանու և ոչ մի անդամի հետ: Գասպարյանն անգամ շնորհավորեց Երևանի քաղաքապետ Տարոն Մարգարյանին ծննդյան 36-ամյակի կապակցությամբ:
